Лыхнашҭа аҽаҩраныҳәа азгәаҭара ааигәахоит, сынтәа анхацәа раалыҵ ӡырыргоит абҵара 3 рзы. Аныҳәа ахьымҩаԥгахо ақыҭа аԥшәмацәа шазхиоу агәыла–азла, асасцәа рыдкылара, рыҽшазыҟарҵо, изеиԥшроу сынтәа рҽаҩрақәа, арадио Sputnik аефир аҟны еиҭеиҳәеит Лыхны ақыҭа аиҳабы ихаҭыԥуаҩ Асҭамыр Бганба.
Аицәажәара шәаҳар шәылшоит аудиофаил аҟны хыхь.
Аҽаҩраныҳәа Лыхнашҭа имҩаԥыргоит 1984 шықәса раахыс, акоронавирустә пандемиа аныҟаз ада. Уи иалахәхоит Гәдоуҭа ақыҭақәеи Афон ҿыц ақалақьи, Ҟарачы-Черқьестәылатәи аделегациеи.
Аныҳәа иалахәу зегьы иӡырыргоит рхатәы аалыҵ, рҽаҩра, инаргоит рнапкымҭақәа, еиҿыркаауеит ацәыргақәҵақәа. Лыхнашҭа иқәгылоит акәашаратәии авокалтәии аколлективқәа, аԥсуа естрада ашәаҳәаҩцәа, имҩаԥгахоит аҽырыҩреи амилаҭтә хәмаррақәеи.