АҞӘА, абҵара 7 - Sputnik. Гәдоуҭа араион 2025 шықәсазтәи абиуџьет ҳазҭоу ашықәс иаҿырԥшны аа-миллион мааҭ рыла еиҵахар алшоит ҳәа арадио Sputnik иазеиҭеиҳәеит араион ахадара афинанстә ҟәша аиҳабы Роман Гамсаниа.
Ари зыхҟьаз ареспубликатә биуџьет аҟынтәи аԥарашәара армаҷра ауп. 2024 шықәсазы аԥарашәара 228 миллион мааҭ ыҟазҭгьы, 2025 шықәсазы уи 180 миллион мааҭ роуп иҟало.
"Ажәакала 48 миллион рыла еиҵахоит. Ус шакәугьы ари аивыгара ахатәы лагалақәа рыла ихаҳарҭәаауеит. Уи асоциалтә усхк аусзуҩцәа ирнырԥшхоит. 2025 шықәсазы ауалафахәқәа роума, асоциалтә шәарақәа роума - еиҭакрак роуам", - ҳәа иҳәеит Гамсаниа.
2024 шықәсазы Гәдоуҭа араион абиуџьет 707 миллион ыҟоуп. Урҭ рҟынтәи ахатә лагалақәа – 326 миллиони 776 нызқьи мааҭи итәоит. Уи адагьы 228 миллион мааҭ ареспубликатә биуџьет иҟанаҵаз аԥаразоужьра иаҵанакуеит, Риҵатәи амилаҭтә парки Афонҿыцтәи аҳаԥи русураҟынтәи ахыхрақәа – 152 миллиони 226 нызқь мааҭ инаӡоит.