Ааигәа ААУ астудентцәеи, аиҿкаара “Алашара” аволонтиорцәа рхаҭарнакцәеи рзы имҩаԥгаз аҵара шеиҿкааз, уи ахықәкы атәы арадио Sputnik аефир аҟны далацәажәеит аҿар аус рыцуреи абҩарҵәыреи рзы Адунеизегьтәи аԥсуа-абаза жәлар рконгресс (АААК) аҟәша аспециалист Есма Кәыҵниаԥҳа.
Адунеизегьтәи аԥсуа-абаза конгресс аҿаԥхьа иқәнаргло адҵа хадақәа иреиуоуп аԥсуа-абаза жәларқәа реимадарақәа рышьақәыргылареи рырӷәӷәареи, еиҳараӡакгьы аҿар реидкылареи реиҭанеиааира аиҿкаареи.
ААУ астудентцәеи аиҿкаара "Алашара" аволонтиорцәеи еицырзеиԥшу атренингқәа раԥхьаӡа акәны имҩаԥган, урҭ ирылахәын жәҩык астудентцәеи быжьҩык Абазашҭа ахаҭарнакцәеи, лҳәеит Кәыҵниаԥҳа. Аҿарацәа рзы Аԥсны имҩаԥгаз атренингқәа рҟны х-проектк алкаан: аекологиа, абызшәа, акультуреи аҭоурыхи рӡыргара иадҳәалоу.
Аицәажәара инеиҵыхны ишәаҳар шәылшоит аудиофаил аҟны хыхь.