Аҟәа иаатит "Акакаҷ" ҳәа хьӡыс измоу араӡны иалхәу, ажәытә аԥсуа-абазатә техникала иҟаҵоу арҩычагақәа рцәыргақәҵа. Уаҟа зусумҭақәа аарԥшу, аԥсуа бренд "Акакаҷ" аԥҵаҩцәа ируаӡәку, асахьаҭыхҩы Мактина Гогьиаԥҳа арадио Sputnik иазеиҭалҳәеит, араӡын лыхқәа рыҟаҵаразы арҵаратә проект шцәырҵыз, идзырҵоз, насгьы анаплыхқәа рыҟаҵара иацу акәамаҵамарақәа ртәы.
Хҩык аԥсуа ҟазацәа – Лена Лабахәуа, Стелла Саӡба, Мактина Гогьиаԥҳа русумҭақәа рыла ишьақәгылоу араӡын иалхәу арҩачагақәа рцәыргақәҵа аус аулоит ԥхынҷқәын 4 рҟынӡа.
Араӡны аус адулара ишалагаз атәы еиҭаҳәо Мактина Гогьиаԥҳа илҳәеит, апроект шаԥшьгаз 2018 шықәсазы ҳџьынџьуаҩ Баҳиџье Баӷба илыбзоураны.
"Ҭырқәтылантәиа анапҟазацәа ааит, дара акурсқәа мҩаԥыргон. Акурс ҳахысит. Иаҳдырҵеит. Иалаз зегьы атехника аҭҵааразы агәаҳәара ҳауит. Уи иаҵоу амаӡақәа ҳарҳәон ҳарҵаҩцәа. Атехника хьанҭазаргьы, анапҟазара злоу ауаҩы ишьҭикаар ауеит", - ҳәа лҳәеит аҟаза.
Ацәыргақәҵаҿы иӡыргоуп шықәсык иалагӡаны иаԥҵаз аусумаҭақәа 60 инарзынаԥшуа.
Инарҭбааны аиҿцәажәара шәаҳар шәылшоит аудиофаил аҟны.