Аԥсны имҩаԥысраны иҟоу афестиваль "Мандарин" аиҿкааҩцәа руаӡәк Сариа Аргәынԥҳа арадио Sputnik аефир аҟны еиҭалҳәеит уи апрограмма шышьақәгыло, аҭааҩцәа ирыдыргало атәы.
Афестиваль "Мандарин" раԥхьаӡа акәны Аԥсны имҩаԥысуеит 2025 шықәса ажьырныҳәамза 3 инаркны 8 рҟынӡа. Уи иаҭаауа рзы еиуеиԥшым ауснагӡатәқәа еиҿкаахоит: Гәыматәи астанциаҿы "апатырқалтә чара амҩаԥгара", уа афотозона, аторт, аҭаца лышәҭшьыҵәра разырхиара; амандаринатә баҳчақәа рҭаара, ацитрустә шәырқәа рыҭаара, амхурсҭақәа рҿы афотоҭыхра амҩаԥгара; Аԥснытәи акинорежиссиорцәа рфильм кьаҿқәа рыхәаԥшра, амшын аԥшаҳәа Marnero аҿы урҭ рыҿцәажәара; жәлар рнапкымҭақәа рҟазацәеи афермерцәеи рцәыргақәҵа аҭаара; аҟазара-классқәа рылахәхара; аҳауатә ԥышҭарч ду ала аԥырра, аетнопарк "Аԥсны" аҿы иҟоу ахәыҷтәы музыкатә студиа азыӡырыҩра.
Афестиваль аҳәаақәа ирҭагӡаны адунеитә рекорд ашьақәыргылара азԥхьагәаҭоуп.
Аҭыԥқәа руак аҿы амандарина иалху хә-метрак зыҳаракыра ыҟоу аҵла шьақәыргылахоит. Аҵыхәтәантәи ирекордтәу ҳәа иԥхьаӡаз амандаринҵла х-метрак аҳаракыра аман.
Аицәажәара шәаҳар шәылшоит аудиофаил аҟны хыхь.