Апроект ҳхы иҭеижьҭеи акрааҵуан, аха аполитикатә мзызқәа ирхырҟьаны иаҳзыҟаҵомызт ҳәа азгәалҭеит аицәажәараҿы Анқәабԥҳа. Аҩқалақьк рҿы аиԥыларақәа ирылахәын 60-ҩык рҟынӡа ауааԥсыра. Ирацәан Аԥснынтә Ахәаахәҭратә палата иабзоураны ишьҭыз аалыҵқәа.
"Ҳазлацәажәоз даара ирацәан. Гәахәарыла ирыдыркылеит ҳҭоурых. Аԥсны шыԥшӡоу рбеит афильмқәа рыла. Аҳәынҭқарра ахьыԥшымра амазароуп ҳәа еизаз ирҳәоз ажәақәа гәахәарыла иҳадаҳкылон. Ари зызкыз акультура акәын, ҳқьабзқәа рӡыргара акәын. Аполитика цәгьоуп, усҟак ҳалалар ҳҭахӡамызт, аха уахь ҳаниасуаз, аилкаарагьы ыҟан", - ҳәа еиҭалҳәеит Анқәабԥҳа.
Аԥсны Ахәҳаахәҭра-ааглыхратә палата Шотландиатәи ахаҭарнак илҳәеит ахәылԥазқәа рышьҭахь еиҳарак лхы-лгәаҿы иаанхаз.
"Аԥсны 30 шықәса ҵуеит ҳхатә ҳәынҭқарраны ҳаҟоижьҭеи, шәара уи аӡбахәгьы шәыздырӡом, ҳаҟаӡамшәа жәбоит - уи ҳагәхьауп. Уи ргәаҟынӡа инеит. Аԥсны ҳзымнеиуазар, ара ҳбывагылоит ҳәа сарҳәон, сгәы ԥшааит ус иансаҳа", - ҳәа азгәалҭеит Анқәабԥҳа.
Инеиҵыху аиҿцәажәара шәазыӡырҩыр шәылшоит аудиофаил аҿы.