АҞӘА, ажьырныҳәа 7 - Sputnik. Аԥсуа-аурыс усеицура азҵаарақәа ирылацәажәеит Аҧсны ахада Бадра Гәынбеи Аҳәынҭдума жәларбжьаратәи аусқәа рзы аилак ахада Леонид Слуцкии. Абри атәы аанацҳаит Аԥсны ахада ипресс-маҵзура.
Гәынба иазгәеиҭеит ҳастратегиатә партниори ҳареи ҳаизыҟазаашьақәа рырҕәҕәара ҳреспублика аполитика ихадоу ахырхарҭа шакәу.
"Аԥсны аибашьцәа урыстәылатәи рашьцәа ирывагыланы иҷыдоу арратә операциа азонаҿы Урыстәыла аинтересқәа рыхьчоит. Агәра ганы сыҟоуп аоперациа алҵшәақәа шынагӡахо", - ҳәа азгәеиҭеит иара.
Слуцки иакәзар, иазгәеиҭеит иара иганахьала аҩтәылак реизыҟазаашьақәа рырҿиара дшазыхиоу. Иара убас Гал араион аҿы иҟалаз арыцҳаразы адышшылара ҟаиҵеит. Уи адагьы ареспублика атәылауаа Қьырсаныҳәа рыдиныҳәалеит.