Сынтәа Гәыдиса Ҭодуа итеатртә школ ахь ҿыцны ирыдыркылоит 5 инаркны 18 шықәсанӡа зхыҵуа. Уахь ишрыдыркыло, аҵара шеиҿкаахо, шаҟа аамҭа ицо, хадаратәла азҿлымҳара зырҭо, арадио Sputnik аефир аҟны далацәажәеит атеатртә школ анапхгаҩы Гәыдиса Ҭодуа.
Атеатртә школ ахь сынтәа ахәыҷқәа алԥшаарада ирыдыркылоит.
"Ҳастудиа аԥҵоижьҭеи аашықәса ҵуеит. Сынтәагьы есышықәса еиԥш агәыԥ ҿыц ҳадаҳкылоит. Ҳара ҳзы ихадоу - ахәыҷы аԥсуа бызшәа идыруазароуп, избанзар ари аԥсышәала иқәҳаргыло аспектакльқәа ахәыҷқәа злахәу акызаҵәык ауп иҟоу агәыԥ Аԥсны. Егьыс иҟоуп ирацәаны астудиақәа. Анкьа еиԥш акастинг мҩаԥаҳгаӡом. Ҳа ҳзы ихадоуп ахәыҷы ихаҭа агәахәара имазарц астудиаҟны ихы аарԥшразы, актиортә ҟазара инапы аликырц азы, убри аҟынтә мызкы иҭагӡаны ахәыҷы иазнеишьа гәаҳҭоит, ахәыҷгьы еиликаауеит ари азанааҭ иҭахума. Ҳҽазыҟаҵарақәа фымз имҩаԥысуеит, анаҩс аспектакль ақәыргылара ҳалагоит ", - иҳәеит Ҭодуа.
Аицәажәара инеиҵыхны ишәаҳар шәылшоит аудиофаил аҟны хыхь.