Аԥсны зҽаԥсазтәыз ажурналист, арратә корреспондент, аорден "Ахьӡ-аԥша" ахԥатәи аҩаӡареи "Агәымшәараз" амедали занашьоу Даур Инаԥшьба иахьа аҵыхәтәантәи имҩахь днаскьаргоит иқыҭа гәакьа Ҷлоу.
Ззанааҭ гәыкала иазыҟаз, еиҵагыло абиԥара иарӷьажәҩаны ирывагылаз ауаҩ гәыраз илшамҭақәа, ицәаҩа-иҟазшьа, арадио Sputnik аефир аҟны дазааҭгылеит ибзианы дыздыруаз, изааигәаз, аус ицзухьаз Аԥсны ажурналистцәа реидгыла ахантәаҩы Руслан Ҳашыг.
"Даур иҭоурых иаанарԥшуеит иҳагу шырацәоу Ажурналистцәа реидгыла аганахьала, аҳәынҭқарра аганахьала асоциалтә, агәабзиарахьчаратә хырхарҭала. 65 шықәса иҭәымҭа, абри иԥышәеи ихигази ҳасаб азуны, аҵарадырраҟны, ажурналистикаҿы аџьабаа ибарц анилшоз аамҭазы, игәамбзиара иахҟьаны адунеи иԥсахит. Ари ахҭыс аҟынтәи иалкаатәу, изызхәыцтәу рацәоуп", - ҳәа азгәеиҭеит Ҳашыг.
Иара иажәақәа рыла, Даур Инаԥшьба изанааҭ аҟны илшамҭақәа рхадараҿы игылоуп аԥсуа бызшәала, аԥсышәала ажурналистика зырҿиоз рхыԥхьаӡараҿы даԥхьагылаҩны дахьыҟаз.
"Аамсҭашәара ҟьаланы иааӡом, ааӡара иахылҿиаауеит. Даур аӡәы ибжьы ҭыганы диацәҳаит ҳәа акәым, ибжьы ҭыганы аӡәгьы димацәажәаӡацызт. Ауаҩы ихымҩаԥгашьа, иара хаҭалатәи ихымҩаԥгашьа ауаа дшырзыҟоу, иахылҿиаауеит иара ишизыҟоу… Абри акырӡа иҳараку ҟазшьоуп ауаҩы ажурналистикаҿы алҵшәа бзиа иманы дҟаларц азы, ауаҩы зҿы аус имоу ижәлар рыҩныҵаҟа иажәа агәра рго дҟаларц азы. Ауаҩы ихы пату ақәиҵозароуп иаргьы пату иқәырҵартә еиԥш зымаҵ иуа, дзыҿцәажәо. Акырӡа ихьанҭоуп убас еиԥш иҟоу аизыҟазаашьақәа рышьақәыргылара, рыхьчара, еснагь рықәныҟәара", - иҳәеит Руслан Ҳашыг ажурналист Даур Инаԥшьба иҟазшьа аҷыдарақәа дрылацәажәо.
Аицәажәара инеиҵыхны ишәаҳар шәылшоит аудиофаил аҟны хыхь.
Даур Инаԥшьба Аԥсуа радио аҟны аусура далагеит 23 шықәса анихыҵуаз. Уи ашьҭахь дҭалеит Москватәи аҳәынҭқарратә университет ажурналистика афакультет, уи даналга ашьҭахь агазеҭ "Аԥсны ҟаԥшь" аҟны аус иуан.
1990 шықәса инаркны аҵыхәтәантәи имшқәа рҟынӡа аус иуан Аԥсуа телехәаԥшраҟны. Аԥсны жәлар Рџьынџьтәылатә еибашьраан арратә корреспондентс дыҟан. "Агәымшәаразы" амедал ианашьан. Даур Ганта-иԥа Инаԥшьба 65 шықәса дырҭагылан.