Анаԥшцәа раҳасабала Аԥсны ахада иалхрақәа рахь иаауеит Урыстәылеи, Аахыҵ Уаԥстәылеи, Приднестровиеи ралхратә комиссиа хадақәа рлахәылацәа. Заанаҵтәи адыррақәа рыла 60-70-ҩык рҟынӡа жәларбжьаратәи анаԥшцәа аараны иҟоуп алхрақәа раан. Алхратә комиссиа хада аҟынтәи ааԥхьара зауз, издызкылаз, насгьы ааԥхьара ҟазҵар зылшо Аԥсны аусҳәарҭақәа дырзааҭгылеит арадио Sputnik аефир аҟны АКХ алахәыла Алиас Бранӡиа.
Иара иажәақәа рыла, егьырҭ ашықәсқәа реиԥш сынтәагьы Алхратә комиссиа хада аҟынтә ааԥхьара рышьҭит Урыстәыла, Аахыҵ Уаԥстәыла, Приднестровиа иҟоу рколлегацәа рахь, убасгьы Жәлар реизара, Ауаажәларратә палата аҟынтәи ус еиԥш ааԥхьарақәагьы шьҭын.
"Анаԥшҩы алхратә процесс ааникылар ауӡом, уи шцо ицоит, аха акы ибазар (аилагара-азгәаҭа), Алхратә комиссиа хадахьы, мамзаргьы аҭыԥантәи алхратә комиссиахь адырра ҟаиҵоит. Уа аҭыԥаҿы иҟоу акомиссиа иаӡбоит уи азҵаара. Уа ианырзымӡбо аҭыԥантәи алхратә комиссиа хадахьы ирышьҭоит, уигьы иаднамкылазар, усҟан ауп ҳара ҳахь иаанаарышьҭуа, мамзаргьы иаразнак аӡбарҭахь ицартә алшара рымоуп. Алхыҩ изин еилагазар акомиссиаҟны ашшыԥхьыӡ иҩыр илшоит, ма аӡбарҭахь арзаҳал наишьҭыр ауеит", - иҳәеит Бранӡиа.
Аицәажәара инеиҵыхны ишәаҳар шәылшоит аудиофаил аҟны хыхь.