АҞӘА, ажьырныҳәа 27 - Sputnik. Урыстәыла Агәабзиарахьчара аминистрраҟынтәи аделегациа Аԥсныҟа иааит агәабзиарахьчара аусхк аҟны аҳәынҭқарратә усбарҭақәа роптимизациеи русура ахаҭабзиара аизырҳареи рызҵаарақәа рзы аиҿкаара-методикатә цхыраара аҟаҵаразы.
Аминистр ин.н. Едуард Быҭәбеи дареи еицны Гагратәи араионтә хәышәтәырҭа, Пицунда, Гәдоуҭа, Афон ҿыцтәи рхәышәтәырҭақәа ирҭааит.
Акадрқәеи атехникеи рыла реиқәыршәара, аҳақьымцәа ирԥынгыло ауадаҩрақәеи аҭахрақәеи рызҵаарақәа шьҭыхын. Уаҵәы Аҟәа амедицинатә усбарҭақәа – Ареспубликатә хәышәтәырҭа хада, зыргылара иаҿуи аус зуеи ахәыҷтәы хәышәтәырҭақәа, аинфекциатә хәышәтәырҭа рҭаара азԥхьагәаҭоуп.
Ажьырныҳәа 29 рзы аспециалистцәа Очамчыра, Гал, Тҟәарчал ақалақьқәа рхәышәтәырҭақәа рахь ицоит.