АҞӘА, жәабран 1 - Sputnik. Аԥсуа жәлар ахада иалхрақәа раан лҵшәас ироуазаалак, Урыстәыла ҳаҭырла иаднакылоит ҳәа аҳәамҭа ҟаиҵеит Урыстәыла ахада Иусбарҭа аиҳабы актәи ихаҭыԥуаҩ Сергеи Кириенко.
"Аха алхрақәа ирласны имҩасуеит, анаҩс ҳара ҳазхәыцроуп акрызҵазкуа аҿиара апрограмма. Иахьа Урыстәылеи Аԥсни рыбжьара иҟоу аекономикатә усеицура апотенциал иахьынӡахәҭоу инагӡам — уи умбар залшом", — ҳәа инаҵшьны иазгәеиҭеит иара.
Кириенко иажәақәа рыла, Аԥсны аԥсабареи аҳауеи иамоу рыла атуризм, асанатор-ԥсшьаратә хәышәтәра, агәабзиарахьчара рыҿиара хымԥадатәиуп, уи азы иаҭахуп аинфраструктура арҿиара, аинвестициа дуқәа ралагалара. Арҭ азҵаарақәа рыӡбара алшоит, аха уи ҭынч, аҳаҭыреиқәҵареи азҿлымҳареи аарԥшны имҩаԥгатәуп ҳәа инаҵшьны иазгәеиҭеит иара.
Аԥсны ахада заанаҵтәи иалхрақәа жәабранмза 15 рзы имҩаԥысуеит. Уи имаҵурахьы хәҩык акандидатцәа ықәгылоуп.