АҞӘА, жәабран 12 - Sputnik. Аԥсны Аҳәынҭқарра Аенергетикеи атранспорти рминистрра адырра ҟанаҵеит Урыстәылатәи Афедерациа арегионқәа Аԥсныҟа аҳаиртә еимадара ишиашоу абжьаҵара ишазхиоу азы активла аҳәамҭақәа рыҟаҵара иалагеит ҳәа. Ари атуризм аусхк аҿиареи ҳҳәынҭқаррақәа рыбжьара аимадара арӷәӷәареи рзы аҳәаа ҿыцқәа аанартуеит.
Аминистрра уажәтәи аамҭазы Иамало-Ненецтәи автономтә округ, Коми Аҳәынҭқарра, Ханты-Мансиисктәи автономтә округ рҟынтәи ииашоу аҳаиртә ԥыррақәа реиҿкаара азҵаара аус адулара иаҿуп. Агәра ганы ҳаҟоуп ари Аԥсны атранспорттә маншәалара аиӷьтәреи атуристцәа радԥхьалареи аус аҟны акыр зҵазкуа шьаҿаны ишыҟало.
Уи адагьы, Урыстәылатәи Афедерациа егьырҭ арегионқәа Аԥсни дареи рыбжьара ииашоу аҳаиртә еимадаразы аинтерес аадырԥшуеит. Ахәҭакахьала, Нижни Новгород ахада Иури Шалабаев Аҟәа усурала даҭааны даныҟаз, арегион ари ахырхарҭала аусеицура ишазхиоу шьақәирӷәӷәеит.
Ари ажәалагала ҳмаршрут азы аҭахра ду шыҟоу аанарԥшуеит, насгьы Аԥсны атуризм аҿиаразы алшара дуқәа шыҟоу аршаҳаҭуеит. Ҳара агәра ганы ҳаҟоуп, Урыстәылеи ҳареи иҳабжьоу аусеицура абзоурала, ҳтәыла атуристтә усхк аҟны аԥеиԥш бзиа змоу ахырхарҭақәа жәпакы аԥсҭазаара ҿыц шроуа, насгьы атуристцәа арахь раареи рыԥсшьареи рзы иманшәалоу аҭагылазаашьақәа раԥҵара шалыршахо.
Аԥсны Аҳәынҭқарра Аенергетикеи атранспорти рминистрра ҳтәыла аекономикатә ҿиареи аизҳазыӷьареи ирыцхраауа атранспорттә еимадара аҿиареи аинфраструктура аиӷьтәреи рзы активла аусура иацнаҵоит.