АҞӘА, жәабран 21 - Sputnik. Аԥсны Аҭагылазаашьа ҷыдақәа рминистрра аусзуҩцәа ареспубликаҿы иауз асы иахҟьаны рмаҵуратә уалԥшьақәа ирӷәӷәоу арежим ахь ииагахеит ҳәа Sputnik иазеиҭеиҳәеит аминистр инапынҵақәа назыгӡо Лев Кәыҵниа.
Иара иҳәеит макьаназ аҳауатә ҭагылазаашьа бааԥс иахҟьаны машәырк ҟалеит ҳәа адырра шыҟам.
Аԥсны Аҳәынҭавтоинспекциа аиҳабы актәи ихаҭыԥуаҩ Аслан Базба Sputnik ишазеиҭеиҳәаз ала, илеиуа асы ареспубликатә мҩаду аҿы амашьынақәа рныҟәара иаԥырхагам.
Иара иажәақәа рыла, еиҳа иуадаҩу аҭыԥқәа рҿы атехника асы арыцқьара иаҿуп, амҩа аҵаа иамкырц азы аԥслымӡ ықәрыԥсоит.
"Џьаргьы еиҵахарак ыҟам, атранспорт абжьааԥнеиԥш иныҟәоит. Амҩа асы ақәгаразы иахәҭоу атехника ҳамоуп", — ҳәа иҳәеит Базба.