Аԥсни Ҟрыми рсахьаҭыхыҩцәа ҿарацәа еицырзеиԥшу ацәыргақәҵа "Ҩ-ҟәарак" аатит иахьа Аԥсуа драматә театр афое аҟны. Аусмҩаԥгатә еиҿкаан Урыстәылеи Аԥсни ркультура аминистррақәа рыдгыларала. Арҿиаратә цҳақәа рырҭбааразы, аԥышәа аимдаразы ацәыргақәҵа иарбан ҭагылазаашьоу ирзаԥнаҵо, иззыԥшу уи аҟынтә, арадио Sputnik аефир аҟны далацәажәеит ацәыргақәҵа алахәыла Арсоу Берзениа.
Иара иусумҭақәа ҩба алхын ацәыргақәҵазы, урҭ аԥсабарасахьа аадырԥшуеит, иҳәеит асахьаҭыхҩы. Иара иазгәеиҭеит иалхыз аусумҭақәа Ҟрымтәи асахьаҭыхыҩцәа рнапы иҵыҵыз иаҳа иазааигәоу шракәу.
"Азнеишьа аформақәа еиԥшуп, аха анагӡашьа, насгьы астилистика уҳәа, ҳәарада, ианубаалоит иаҳа ҳаԥсуа цәаҩа", - иҳәеит Берзениа.
Иара иазгәеиҭеит ас еиԥш ацәыргақәҵақәа реицымҩаԥгара шаҭаху, аҟазаратә диалог шышьақәдыргыло.
"Даара ихымԥадатәиуп уа уеиԥш иҟоу, аха даҽа хәыцшьак, знеишьак, даҽа блак ала иахәаԥшышьа, хәшьарас иарҭо даара аинтерес ҳзаҵоуп ҳара", - иҳәеит Берзениа.
Аицәажәара инеиҵыхны ишәаҳар шәылшоит аудиофаил аҟны хыхь.
Аԥсни Ҟрыми рсахьаҭыхыҩцәа ҿарацәа еицырзеиԥшу ацәыргақәҵа "Ҩ-ҟәарак" аартызаауеит хәажәкыра 30-нӡа.