АҞӘА, жәабран 25 - Sputnik. Аԥсны Аҳәынҭавтоинспекциа змашьынақәа ишьақәгылаз амш иазыҟаҵам арныҟәцаҩцәа рахь ааԥхьара ҟанаҵеит ареспубликатә мҩаду ахь идәықәымларц.
Ареспубликатә мҩаду уажәазы иахьабалак аныҟәара уадаҩуп. Еиҳарак аҭагылазаашьа уадаҩуп Гәдоуҭа араион аҿы ҳәа азгәеиҭеит Аԥсны Аҳәынҭавтоинспекциа аиҳабы Дамеи Аҩӡба.
Иара ишиҳәаз ала, амҩаду арыцқьара ишаҿыц иаҿуп, аха атехника асы ақәгареи аԥслымӡ ақәԥсареи иахьӡаӡом.
Аҩӡба иажәақәа рыла, ареспубликатә мҩаду аҿы амҩатә машәырқәа хԥа азгәаҭан. Аӡәгьы ааха имоуӡеит.