Урыстәылатәи Афедерациа ахада Владимир Путин Аԥсны ахада ҿыцс иалху Бадра Гәынба дидикылеит Кремль. Излацәажәаз азҵаарақәа, Урыстәылеи Аԥсныи ирыбжьоу аиҩызаратә, аусеицуратә еизыҟазаашьақәа ныррас ианаҭо уажәтәи аиԥылара, лҵшәақәас иаанашьҭуа азы, арадио Sputnik аефир аҟны игәаанаара иҳәеит аполитолог Беслан Ҳагба.
"Владимир Путин иԥылара акырӡа аҵанакуеит. Иаартны иаҳҳәароуп Урыстәылатәи Афедерациа аԥхьаҟагьы ахылаԥшра шарҭало, иаҳҭахқәоу азҵаарақәа зегьы рыӡбара акәым, аха абри еиҳараӡак напхгаразыҭатәу агуманитартә программақәа, аекономика аҿиара, еизааигәаны аусқәа амҩаԥгаразы ҳаԥхьаҟа ишьҭоу азҵаарақәа рыӡбара даара акраҵанкуеит. Аиԥылараҟны ҩаԥхьа иаҳбеит Аԥсны исуверентәу акәны ишазныҟәо, ҳаԥхьаҟагьы ус ишазнеило. Изаҳӡарызеи Аԥсны азхазҵахьоуаҳәынҭқаррақәа даараӡа имаҷуп. Урыстәылеи ҳареи убас еиԥш аизыҟазаашьа ҳабжьаҳҵароуп ҳәынҭқарраҵас ашьақәгылара аиуроуп Аԥсны, аԥхьаҟа даҽа еиҭахәаԥшрак амаиуртә еиԥш. Убри азы иаҭахуп иӷәӷәаны аидгылара, аинтеграциа. Асоциалтә, аекономикатә, агуманитартә, ашәарҭааратә зҵаарақәа зегьы зыбзоуроу Урыстәылатәи Афедерациа ауп. Убри аҟынтәи сара уамашәа избаӡом абас иаалырҟьаны алхрақәа рышьҭахь Аԥсны ахада ҿыцс иалҳхыз Урыстәылатәи Афедерациа дахьрыдыркылаз", - иҳәеит Ҳагба.
Аицәажәара иаҳа инеиҵыхны ишәаҳар шәылшоит аудиофаил аҟны хыхь.
Бадра Гәынба ҿыц иалхыз Аԥсны аҳәынҭқарра ахада иаҳасабала Урыстәылаҟа раԥхьаӡа акәны официалла днеит хәажәкыра 5 рзы.