Кандид Ҭарба ихьӡ зху аҳәынҭқарратә акәашаратә ансамбль "Кавказ" азы иҳаҩсыз ашықәс арҿиара аганахьала изеиԥшраз, ақәгыларақәа ахьымҩаԥнагаз, 30 шықәса ахыҵра инамаданы аиубилеи азгәаҭара залыршамхаз, аусутә ҭагылазаашьа шыҟоу, агастрольқәа атәыла анҭыҵ рымҩаԥгаразы лшарақәас иамоу, абарҭқәа арадио Sputnik астудиаҟны еиҭеиҳәеит асахьаркыратә напхгаҩы, Аԥсны Жәлар рартист Арвелод Ҭарба.
Аҳәынҭқарраҟны иазгәарҭоз аныҳәақәа, еиуеиԥшым арыцхәқәа инарымаданы еиҿкааз аконцертқәа 10-11 рхы аладырхәит "Кавказ" акәашацәа иҳәеит ансамбль асахьаркыратә напхгаҩы.
"Аконцертқәа зегьы ҳхы рылаҳархәуан. Егьыс асолотә қәгыларақәа, акассазы мацара иҟаҳҵеит 14 концерт. Урҭ раан афилармониаҟны иааҳарҳаз аԥара аҳәынҭқаррахь иаларҵон, ашәахтә иахырхыз анаҩс ҳара ҳахь иахырԥхьаӡалеит. Аԥхын миллионки хәышә нызқь мааҭ аланаҵеит ансамбль "Кавказ", нас ашәахтә ахыхны, егьи иаанхаз аԥара ҳара ҳахь иахырԥхьаӡалеит, уа иҭоуп. Иара аиубилеи нанҳәа 8 рзы ауп ианақәшәаҵәҟьо, аха иаҳҭахын ашықәс анҵәамҭазы иарҭбааны, хәыҷык ҳҽаазыҟаҵаны ноиабр 22 рзы иҟаҳҵарц", - иҳәеит Ҭарба.
Аицәажәара инеиҵыхны ишәаҳар шәылшоит аудиофаил аҟны хыхь.