АҞӘА, хәажәкыра 15 - Sputnik. Аԥсны жәлар рышәҟәыҩҩы Алықьса Гогәуа игәалашәарақәа зну ашәҟәы "Амшынҵақәа" ҭыҵит.
Аԥснытәи аҳәынҭқарратә шәҟәҭыжьырҭа аиҳабы Даур Наҷҟьебиа иажәақәа рыла, ашәҟәы атираж 500 цыра ыҟоуп.
"Ари ашәҟәы ианылеит Алықьса Гогәуа 1993 шықәса инаркны 2018 шықәсанӡа ииҩуаз амшынҵақәа. Уаҟа ашәҟәыҩҩы ихатә ԥсҭазаареи ирҿиареи ааирԥшуеит, уи аамҭазы имҩаԥысуаз ахҭысқәа иналукааша автор иблақәа рыла иаҳбоит", — ҳәа иазгәеиҭеит иара.
Наҷҟьебиа инаҵшьны иазгәеиҭеит ашәҟәы асахьаркыратә ҵакы адагьы, ауаажәларра-ҭоурыхтә ҵакы шамоу. Алықьса Гогәуа усҟантәи аамҭазы Аԥсны иҟалаз ахҭысқәа жәпакы ирызкны анҵамҭақәа ҟаиҵеит, уи аԥхьаҩцәа ирылнаршоит урҭ амшқәа бла ҿыцла ахәаԥшра, иҵегьы иҵауланы рыҭҵаара, ҿыц рызхәыцра.
Ашәҟәқәа Краснодарынтәи Аԥсныҟа иаарласны иааргоит. Урҭ Аҟәа ашәҟәыҭирҭақәа рҿы раахәара ҟалоит.