Аицлабра "Аԥсны акоманда" алахәхаразы арзаҳалқәа рыдкылара аамҭа хәажәкыра 21 рҟынӡа инахоуп. Иааизакны аицлабрахь 2800 инареиҳаны арзаҳалқәа рыҭан, урҭ рыбжаҩык 18-25 шықәса зхыҵуа атәылауаа роуп. Аиҿкааҩцәа ражәақәа рыла апроект ахь аинтерес иззыԥшыз аасҭа еиҳахеит. Здыррақәа ҳараку аспециалистцәа разымхара аамҭазы аиԥш зеиԥшу аусмҩаԥгатә лҵшәас иаанашьҭыр алшо, аицлабра ахықәкы, уи зхы алазырхәыша, мамзаргьы иззаԥсам, иалахәхо ралԥшаара, ахәшьара рыҭара шеиҿкаау, арадио Sputnik аефир аҟны дрылацәажәеит аицлабра "Аԥсны акоманда" Ахылаԥшратә хеилак алахәыла, ААУ аекономикатә теориа акафедра арҵаҩы Гьаргь Габуниа.
Аицлабра "Аԥсны акоманда" хықәкыс иамоу гәҭакыла, хәыцшьала, дыррала анапхгаратә ус аныҟәгара зылшо ауаа ралԥшаароуп, иҳәеит Габуниа.
Иара иазгәеиҭеит аицлабра аҵыхәтәантәи ахәҭа аҟынӡа ауаа алзыԥшаауа акомпиутер апрограмма шакәу, ауаҩы ианиҵаз ала, анаҩс лабҿабатәи аиқшәара аҟны досу иқәшәо адҵақәа, азҵаарақәа заанаҵы ишизымдыруа.
"Азнеишьа ауа иуа, аҭынха, агәыла-азла ҳәа ус ҟалашьа амаӡам, избанзар Ахылаԥшратә Хеилак иалоуп аԥсуа ган, иалоуп аурыс ган. Сара дсыздыруам ус еиԥш ауаҩы абра иаалоу зегьы драцәажәаны, дрыуаны, дырҩызаны иҟоу", - иҳәеит Габуниа.
Аицәажәара инеиҵыхны ишәаҳар шәылшоит аудиофаил аҟны хыхь.