Адиспансеризациа иахысраны иҟоу ахәыҷқәа рхыԥхьаӡареи, ари аус шаҟа аамҭа азыԥҵәоуи, насгьы аҵара апроцесс уи ианыԥшуа ианымԥшуа, абри атәы арадио Sputnik аефир аҿы далацәажәеит араион аҵара аҟәша аиҳабы Адамыр Ҳаразиа.
Гәдоуҭа араион аҿы аҵара рҵоит 4317-ҩык аҵаҩцәа. 570-ҩык ахәыҷқәа ахәыҷбаҳчақәа рахь иныҟәоит.
Алагарҭатә классқәа рҿы ахәыҷқәа аҵара дзырҵо арҵаҩцәа игәарымҭар залшом, урҭ ргәабзиара еиҳа-еиҳа ишуашәшәырахо, ҳәа азгәеиҭеит аиҿцәажәараҿы Ҳаразиа. Ахәыҷқәа ргәабзиара еиҳау мал ыҟам, иҳәеит иара.
"Аҭаацәа ақәшаҳҭханы имҩаԥаҳго усуп. Мчыла аӡәгьы дгәарҭаӡом. Зегьы ргәы иаахәаны иазнеиуеит ари азҵаара", - иазгәеиҭеит Ҳаразиа.
Инарҭбааны аиҿцәажәара шәаҳар шәылшоит аудиофаил аҟны.