Аԥсны

Гәынба Апарламент ахь инаишьҭит абџьар аикәыршара иадҳәалоу азакәанқәа рыԥсахрақәа рпроект

Sputnik
АҞӘА, хәажәкыра 21 - Sputnik. Аԥсны ахада ин.н. Бадра Гәынба Жәлар Реизара-Апарламент ахь идәықәиҵеит абџьар аикәыршара аусхк иадҳәалоу азакәанқәа рыԥсахрақәа рпроект.
Уи ауааԥсыра атапанчақәеи аревольверқәеи рныҟәгара азин ҟанаҵом, аха урҭ ҵәахны рымазааразы азин рынаҭоит.
Уи адагьы, атәылауаа абџьар аныҟәгаразы уаанӡа ирыҭаз азин ацынхәрас абџьар аҵәахразы азин роуеит.
Апроект хықәкыс иамоуп абџьар закәаншьаҭала зхы иазырхәо ауааԥсыра иҟарҵо ацәгьоурақәа раԥырҟәҟәаара ҳәа аанацҳауеит аҳәынҭқарра ахада ипресс-маҵзура.