Атуризми асасдкылара аиндустриеи жәларбжьаратәи рцәыргақәҵа MITT, арадио Sputnik аефир аҟны аихшьаалақәа ҟалҵеит Аԥсны атуризм аминистрра аинформациеи аимиџьтә политикеи рыҟәша аиҳабы Оксана Табаӷәуаԥҳа.
Атуризми асасдкылара аиндустриеи жәларбжьаратәи рцәыргақәҵа — MITT мҩаԥысуан хәажәкыра 18 - 20 рзы. Аԥснынтә уи жәаҩык алахәын атуреилахәрақәа, атуроператорцәа, аекскурсиа амҩаԥгаҩцәа рхаҭарнакцәа.
"Иҳалшыз ахәыҷгьы зны-зынла агәра сгаӡом ишҳалшаз. Уа Аԥсны аҳәынҭқарра иазоужьу аҭыԥ маҷуп, аха ус шакәугьы иҳалшоит ауаа радԥхьалара. Даӷьысҭанаа ирымоу аҭыԥ ацәыргақәҵаҿы 100 метрак ԥшьыркца еиҳауп. Убасгьы 4-5 аҳәынҭқарратә ансамбльқәа рыцны инеиуеит. Дара ус уа ишыҟоугьы ҳрыҵахаӡом…Инеиуаз асасцәагьы иазгәарҭон "Аԥсны ҳаҟоушәа ҳгәы иабоит, ус еиԥш аҭагылазаашьа бзиа аԥҵоуп абра" ҳәа. Аԥсуа ашәа аҳәоны, аԥсуа ҩы агьама анубо, угәы иаахәоит сгәаанагарала", - лҳәеит Табаӷәуаԥҳа.
Аицәажәара инеиҵыхны ишәаҳар шәылшоит аудиофаил аҟны хыхь.