Ҵыԥх Суперлигаҿы ихәмаруаз акомандақәа сынтәагьы ихәмаруеит. Урҭ аа-командак ыҟоуп. Амилаҭтә лигаҿы иҟазҭгьы ҵыԥх 12 команда, сынтәа 11 ҟалоит. Х-командак иҟаз ҟалаӡом, аха аҿыцқәа ҩба алалеит ҳәа иҳәеит Манаргиа сынтәатәи ашьапылампылтә сезон аҿы иҟоу аԥсахрақәа ртәы дрылацәажәо.
"Ашьапылампылтә федерациа аҩнуҵҟагьы иҟалеит аԥсахрақәа. Ахада дшыҟац дыҟоуп, аха Амилаҭтә шьапылампылтә лигаҿы Асҭамыр Џьынџьал ицынхәрас дҟалеит Ника Чхапелиа. Асҭамыр Џьынџьал аконтролтә-дисциплинартә хеилак дшахагылац даанхоит. Ахәыҷтәы-қәыԥштә шьапылампылтә лигаҿы Алексеи Иваненко ицынхәрас Шьалуа Ашәхаҵаа дҟалоит. Акомандақәа рыҩнуҵҟагьы, ҳәараҭахума, аԥсахрақәагьы ыҟоуп", - ҳәа иҳәеит Манаргиа.
Инарҭбааны аиҿцәажәара шәаҳар шәылшоит аудиофаил аҟны.