АҞӘА, мшаԥы 2 - Sputnik. Аԥсныҟа Бадра Гәынба иҭоубашьҭаҵарахь иааит Урыстәыла арегионқәа рхадацәа. Ареспубликақәа русеицуреи ргәы иҭақәоу апроектқәеи ртәы - Sputnik аматериал аҿы.
Аекономика аҿиара
Аԥсни Ҟарачы-Черқьессиатәи Ареспубликеи рыбжьара аекономикатә еизыҟазаашьақәа динамикала иҿиоит. Аҩтәылак рыбжьара иҳаҩсыз ашықәс азы атауареикәыршара 850 000 доллар рҟынӡа инаӡеит, уи 2023 шықәсазы аасҭа 23% рыла еиҳауп ҳәа ажурналистцәа ирзеиҭеиҳәеит Ҟарачы-Черқьессиатәи Ареспублика ахада Рашид Темрезов.
Иара Аԥсныҟа дааит атәыла ахада Бадра Гәынба иҭоубашьҭаҵарахь, Урыстәылатәи аделегациа далахәны.
"2012 шықәсазы Аԥсны анапхгареи ҳареи аиқәшаҳаҭра ҳабжьаҳҵеит. Сгәанала, уи ҳаиҭахәаԥшуеит, иҳарҿыцуеит, аинырразы аус ҿыцқәа ҳаԥшаауеит, урҭ акыр ирацәоуп – атуризм, ақыҭанхамҩа, жәаҳәарада, акультуреи аспорти рганахьала аизыҟазаашьақәа", — ҳәа иҳәеит Темрезов.
Краснодартәи атәылаҿацәи Аԥсни еицырзеиԥшу аҳәаа адагьы, акыршықәса ишьақәгыланы иҟоу аиҩызареи аусеицуреи еидырҳәалоит – атәылаҿацә ахада Вениамин Кондратиев.
Иара Аԥсны ахада Бадра Гәынба иҭоубашьҭаҵара ихы алаирхәит. Иҳаҩсыз хәышықәса ирылагӡаны Краснодартәи атәылаҿацәи Аԥсни рыбжьара ахәаахәҭреикәыршара ҩынтә инареиҳаны еизҳаит ҳәа адырра ҟаиҵеит Кондратиев иара и-Telegram канал аҿы.
"Ҳара ақыҭанхамҩеи, ааглыхреи, зегьы раасҭа ихадоу — атуризм аҟни еицаҳзеиԥшу апроектқәа рҿы аԥеиԥш бзиа ҳбоит. Ҳара активла ҟәбантәи акурортқәа ҳарҿиоит, зхаҭабзиара ҳараку, ҳаамҭа иақәшәо аԥсшьаразы аҭагылазаашьақәа аԥаҳҵоит, убарҭ рҩызцәа Аԥсынгьы иаԥҵазар алшоит".
Амедицина, аҵарадырра, афатә ааглыхра, ақыҭанхамҩатә аалыҵқәа рыла аиқәыршәара — абарҭ хырхарҭа хадақәоуп Аԥсни Ҟабарда-Балкариатәи Ареспубликеи русеицура ҟны ҳәа инаҵшьны иазгәеиҭеит уи ахада Казбек Коков.
"Ҳара иаҳҭахуп ҷыдала аекономикаҿы абарҭ апроектқәа рхыԥхьаӡара ацаҳҵар. Иахьа ҳара ҳалацәажәоит, иагьаԥаҳҵоит Ҟабарда-Балкариа ажәлари Аԥсни рзы ихәарҭоу аекономикатә проект ҿыцқәа рзы аусеицура алзыршо акомиссиақәа", — ҳәа инаҵшьны иазгәеиҭеит иара.
Аԥсни Башкортостани 1994 шықәса рзы аиҩызареи аусеицуреи рзы аиқәшаҳаҭра рнапы анаҵарҩы аахыс аимадара рыбжьоуп ҳәа иазгәеиҭеит ареспублика аиҳабыра рԥыза-министр Андреи Назаров.
Акультура, аҵарадырра, аекономика, атуризм уҳәа еиуеиԥшым ахырхарҭақәа рҟны аусеицура мҩаԥысуеит.
Апроект "Башкириатәи ақәранҵыра" аҳәаақәа ирҭагӡаны, Урыстәылатәи арегион аҟынтәи атуристцәа гәыԥҩык ареспублика иаҭаахьеит.
"Ҳтәылауаа ари аус даара иргәаԥхеит. Убри азоуп уажәы Аԥсны атәылауаагьы Башкортостанҟа инеиртә еиԥш апроект аус задаҳуло", — ҳәа иазгәеиҭеит Назаров.
Иара иааигаз адыррақәа рыла, ҳазҭоу аамҭазы Аԥснытәи аарыхыҩцәа Башкортостан раалыҵқәа рыҵәахреи рыҭиреи рзы аҭыԥқәа роуразы алшара рызҭо ахәаахәҭратә ҩны аԥҵара иадҳәалоу аусурақәа мҩаԥысуеит. Иара убас иазгәаҭоуп агуманитартә проектқәа рынагӡара, Аҟәатәи аԥшаҳәаҿы амодернизациа амҩаԥгарагьы уахь иналаҵаны.
"Аԥсны аҳаирбаӷәаза ҿыц иацәыхарамкәа, 80 уада змоу ахәыҷтәы санатори аргыларазы апроект ыҟоуп. Уи ахәыҷқәа алшара рынаҭоит Аԥсны ашықәс зегьы иалагӡаны аҽыхәышәтәреи аԥсшьареи", — ҳәа инаҵшьны иазгәеиҭеит Назаров.
Рашәарамзазы Аҟәаҟа ииашоу аҳаиртә еиадара аԥҵара азԥхьагәаҭоуп. Аҳаиртә ԥыррақәак мчыбжьык ахь знык имҩаԥыслоит.
Атуристтә лшарақәа
Аԥсни Адыгеиеи аимадара ааигәақәа рыбжьоуп, ахәаахәҭратә еикәыршареи акультуратә еимадарақәеи еиздырҳауеит ҳәа иҳәеит (https://t.me/SputnikAbkhazia/27200) Адыгеиа ахада Мурат Кумпилов.
Уи Аԥсны ахада Бадра Гәынба имаҵураҭыԥ аанкылара ацеремониахь Урыстәыла асубиектқәа рнапхгаҩцәа рделегациа даланы дааит.
"Убри аан, жәаҳәарада, ҳара Аԥсны ацхыраара аҳҭалоит – аспорттә хыбрақәа роума, ашкол аума. Иҳалшо ала ҳшәывагылоуп", — иҳәеит иара.
Кумпилов иажәа иацҵаны иҳәеит араион ауааԥсыра Аԥсны атуристтә потенциал ахь азҿлымҳара шрымоу, сынтәа ареспубликаҟынтәи аҿар рделегациа Адыгеиа имҩаԥысраны иҟоу абаҩхатәра злоу аҿар реизара "Фишт" рхы аладырхәуеит ҳәа.
Ханты-Мансиисктәи аокруг – Иугреи Аԥсни рыбжьара иааиԥмырҟьаӡакәа аҳаиртә еимадара ашьақәыргылара алшоит Владислав Арӡынба ихьӡ зху аҳаирбаӷәаза аартра ашьҭахь ҳәа иҳәеит аокруг агубернатор Руслан Кухарук.
Иара иажәақәа рыла, уажәазы аганқәа аԥхынразы аҳаирмҩангарақәа раартра иалацәажәоит, уи назыгӡо аҳаиртә еилахәыра алԥшаара иаҿуп.
"Ҳара иаҳбоит, Иугратәиқәагьы уахь иналаҵаны, Аԥсныҟа атуристцәа рацәаҩны ишаауа. Иахьа урҭ еиҳарак Шәачаҟа ԥсшьара ҳәа ианнеилак, анаҩс автомобилла Аԥсныҟа иаауа роуп".
Ари Иугреи Аԥсни рыбжьара атуристтә еизыҟазаашьақәа рыҿиаразы иманшәалоу аҭагылазаашьақәа аԥнаҵоит.
Акультуратә еимадарақәа
Нхыҵ Уаԥстәыла 30-ҩык аԥсуа поетцәа ражәеинраалақәа реизга аҭыжьра ргәы иҭоуп ҳәа ажурналистцәа иреиҳәеит ареспублика Жәлар Реизара-Апарламент ахантәаҩы Ҭаимураз Тускаев.
Уи инаҵшьны иазгәеиҭеит Уаԥстәыла иналукааша аԥсуа ҵарауаҩ Шьалуа Инал-иԥа ихьӡ ҳаракны ишыршьо ауаԥс жәлар ретногенез аҭҵаарадырратә шьаҭа аԥҵараҿы илагала ду азы.
"Уи ауаԥс жәлари аԥсуа жәлари ирзеиԥшу апринципқәа рацәаны ишыҟоу азы аинтерес зҵоу аиҿырԥшрақәа ааигеит, ҳара аҭҵаарадырратә усхк аҿы аусеицура ҭбаа ҳазхиоуп", — ҳәа иҳәеит Тускаев.
Лаҵарамза анҵәамҭазы Аҟәа Нижни Новгород Амшқәа мҩаԥгахоит, аҵарадырратә, аспорттә, апатриоттә программа ду азԥхьагәаҭоуп ҳәа иҳәеит ақалақь ахада Иури Шалабаев.
Уи Урыстәыла арегионқәа рхадацәа рделегациа далахәны Аԥсны ахада иҭоубашьҭаҵара далахәын.
"Нижни Новгород ақалақь артистцәа, аспортсменцәа, ашколхәыҷқәа, алагерь "Сдесантникхар сҭахуп" ааӡамҭацәа, аҟазаратә коллективқәа, амузеиқәа, атеатрқәа злахәхо аусмҩаԥгатәқәа азԥхьагәаҭоуп Аҟәа ихадоу аҭыԥқәа рҿы", — ҳәа иҩит иара.
Иааизакны Аҟәеи Нижни Новгороди русеицура апрограммаҿы еицырзеиԥшу апроектқәа 60 инареиҳаны иарбоуп. Аԥсны ахада Бадра Гәынба Нижни Новгороди ҳареи ҳусеицура ареспублика зегьы азы аҵак ду шамоу азгәеиҭеит.