АҞӘА, мшаԥы 2 - Sputnik. Афонд "Ашанеи" "Круг добра" афонди аусеицуразы аиқәшаҳаҭра рнапы аҵарҩит.
Адокумент иазԥхьагәанаҭоит имаҷны иуԥыло ачымазарақәа змоу Урыстәыла иатәылауаау аԥснытәи ахәыҷқәа афонд "Круг добра" аҟынтәи иахәҭоу ацхыраара роуразы алшара рыҭара.
Афонд "Ашана" ахь дадҵаалахьеит Диушенн ицәеижьтә дистрофиа змоу зықәра намӡац ахәыҷы. "Круг добра" ахәыҷы ихәышәтәразы иаҭаху зыхә цәгьоу ахәшәқәа рыла иеиқәыршәаразы аусура иалагеит.
Аԥснытәи афонд "Ашана" "Круг добра" захьӡу Урыстәыла ахада ифонди ирыбжьарҵаз аиқәшаҳаҭра ачымазара ӷәӷәақәа змоу ахәыҷқәа рыцхраараҿы аҳәаа ҿыцқәа аанартуеит ҳәа иазгәеиҭеит "Ашана" ашьаҭаркҩы Беслан Шьакаиа.
"Ҳара Урыстәыла иҭабуп ҳәа раҳҳәоит Афонд "Круг добра" абзоурала иҳараку аквалификациа змоу амедицинатә цхыраара аиуразы алшара ахьҳарҭо, насгьы ахәыҷқәа насыԥ рыманы инхарц аҭагылазаашьақәа ахьаԥырҵо азы".