АҞӘА, лаҵара 26 - Sputnik. Урыстәыла атәылауаҩра змоу, Урыстәылатәи Афедерациаҿы ахәыҷқәа рзы аԥаратә цхыраагӡеи ан лмали зауа Аԥсны атәылауаа аиуристтә цхыраара рыҭаразы иҷыдоу аҭел еимадара аԥҵахоит. Абри азы аӡбара рыдыркылеит аиҳабырабжьаратә усуратә гәыԥ раԥхьатәи аилатәараҿы.
Ари аҭел ала атәылауаа алшара роуеит Урыстәыла аҵакыраҿы ашьауӷа рақәыршәара иадҳәалоу азҵаарақәа рзы абжьгарақәеи аиуристтә цхыраареи роурц. Аусуратә гәыԥ алахәылацәа иара убасгьы ирыхәаԥшит аусураҟны ихадоу ахырхарҭақәа:
атәылауаа рыцхрааразы аиҿкаара-зинтә уснагӡатәқәа рынагӡаразы ажәалагалақәа реиқәыршәара;
Урыстәылатәи Афедерациаҿы знапы иану аусбарҭақәеи дареи реимадара аиҿкаара;
асоциалтә еиқәыршәара аусхк аҟны азакәанԥҵара еилазгаз рзы Урыстәыла аҭакԥхықәра зду Аԥсны атәылауаа ирызку адыррақәа рышьақәгылареи системак разаагареи.