АҞӘА, рашәара 18 - Sputnik. "Аԥснытәи атуризм аидгыла" атуристтә џьармыкьа проблемақәа рыӡбара иазкыз аилатәара ашьҭахь арезолиуциа аднакылеит.
Аамҭа кьаҿк иалагӡаны иҟауҵаша азы ихадоу ажәалагалақәа:
атуристтә џьармыкьазы Аетикатә кодекси атуризм аҿы ахеиҿкааратә усбарҭеи аԥҵара,
Ахәқәа рышьақәыргылараан иламысцқьам аконкуренциа аԥырҟәҟәааразы азакәан атехникатә ҟазшьақәа рызҿлымҳара,
атуристтә маҵзурақәа рзы ахаҭабзиаратә стандартқәа рзы Азакәан адкылара.
Аамҭа рацәаны изҭаху аусмҩаԥгатәқәа рахь иаҵанакуеит асасааирҭақәа рклассификациазы Аԥҟара адкылара, атуристтә индустриа арҿиаразы астратегиа аԥҵара, иара убас анхарҭа ҭыԥқәа рзы иаку акритериқәеи ихымԥадатәиу астандартқәеи, ахылаԥшратә механизми рышьақәыргылара.
Анормативтә шьаҭа аԥҵареи аҧшьгамҭақәа рынагӡареи хылаԥшра рынаҭоит Атуризм аминистрраҿы еиҿкаау аусуратә гәыԥ.
"Ҳара ажәалагала ҟаҳҵеит, атуроператорцәеи ҳареи аиқәшаҳаҭра анапаҵаҩраан атуристтә пакет аҭиразы иреиҵаӡоу ахә шьақәыргылатәуп ҳәа. Уи иалнаршоит ари аџьармыкьа аҭышәныртәалара", — иҳәеит Атуризм аминистр ихаҭыҧуаҩ Асҭамыр Барцыц.