АҞӘА, ԥхынгәы 7 - Sputnik. Гагратәи алицеи-интернат ҩ-еихагылак рҿы ашьҭаларҭа ахыбра акапиталтә ремонт хыркәшахеит ҳәа еиҭеиҳәеит Аҵара аминистрра ахаҭарнак Радам Кәырт-оӷлы.
"Атәыла анапхгара рыбзоурала аремонт 11 миллион мааҭ инареиҳаны аԥара азоужьын. Ара 90-ҩык ахәыҷқәа аҵара рҵоит, урҭ акыр ҵуан ари аремонт иазыԥшызижьҭеи. Аҵарашықәс алагамҭа инаркны ҳхәыҷқәа аҭагылазаашьа бзиақәа рҿы аангылара рылшоит", — ҳәа азгәеиҭеит иара.
Аҵаратә усбарҭа ауадақәа, ауадабжьарақәа, аҽыкәабарҭақәа дырҿыцит, аҳауа архьшәашәагақәеи аҩнымаҭәеи шьақәдыргылеит. Ашкол-интернат аҿы иҟоуп амаҭәаӡәӡәарҭагьы, уаанӡа ахәыҷқәа аҩнынтәи ацәарҭамаҭәа ааргон.