АҞӘА, нанҳәа 8 - Sputnik. Аԥсуа-аурыс ҳәаа ахысразы иаадыртит.
Агәаҭара-аушьҭратә ҭыԥ "Ԥсоу" абжьааԥнеиԥш аус ауеит ҳәа аарыцҳаит Аԥсны Аҳәынҭқарратә шәарҭадаратә маҵзураҿы.
Аҳәынҭқарратә ҳәаа ахысраан аԥхьагылара рыҭоуп аекскурсиатә транспорт, автобусқәа, амаршруттә таксиқәа ҳәа аанацҳаит Аԥсны Аҩнуҵҟатәи аусқәа рминистрра.
"Аҳәаа азааигәахараан амҩадуқәа рҿы аныҟәара уадаҩуп. Амашьынаныҟәцаҩцәа рҽырцәырыхьчарц, еилаҩынтуа аныҟәарақәа ҟарымҵарц рҳәоит", — ҳәа аҳәоит аҭыжьымҭаҿы.
Аҭыԥ аҿы амҩанысра еиҿыркаауеит амҩатә полициа аусзуҩцәа.
Аԥсни Урыстәылеи рҳәааҿы иҟоу агәаҭара-аушьҭратә ҭыԥ шьапыла иахысуа, автомашьынақәа, адәыӷба, атранспорт рзы х-сааҭк раҟара иаркын иахьа, украинатәи аԥырҩы дызҭам аҳаирпланқәа рылы ақәыларазы ашәарҭара ахьыҟаз инамаданы.