АҞӘА, нанҳәа 8 - Sputnik. Аԥсны ахада Бадра Гәынба Алан Гаглоев ашәҟәы изишьҭит 2008 шықәса нанҳәамзатәи ахҭысқәа 17 шықәса рхыҵра инамаданы.
Иара инаҵшьны иазгәеиҭеит аибашьраан излагылаз ашьаарҵәыра мшқәа ишаадырԥшыз ауаԥс жәлар рдоуҳа шеицамкуа, рхақәиҭра ахьчаразы агәаӷьра шрымоу, иара убас Аахыҵ Уаԥстәыла ацхырааразы иааз Урыстәыла ауадаҩра иақәшәо аҩызцәа шааннамыжьуа.
"Ҳажәларқәа ртәылақәа рхақәиҭразы еицырзеиԥшу ақәԥара еиднакылоит, ихьыԥшым аҳәынҭқаррақәа – Аԥсны Аҳәынҭқарреи Аахыҵ Уаԥстәыла Ареспубликеи рҭынч ԥсҭазаара ҳаидгыланы еицҳаргылоит", — ҳәа аҳәоит атекст аҿы.
Нанҳәа 7-8 рухаз Қырҭтәыла ҭынч ацәа иалаз Цхинвал иажәлеит. Иара убри аҽны Урыстәыла Аахыҵ Уаԥстәыла иадгыланы иқәгылеит. Иалагеит Хәымштәи аибашьра.