АҞӘА, нанҳәа 12 - Sputnik. Аԥсны амҩадуқәа рҿы авидеокамерақәа анышьақәдыргыла ашьҭахь, аномерқәа рыда аныҟәара иалагаз амашьынарныҟәцаҩцәа рхыԥхьаӡара еиҳахеит ҳәа азгәеиҭеит Аҳәынҭқарратә автоинспекциа аиҳабы Дамеи Аҩӡба.
Убас ала амҩатә ԥҟарақәа еилазго ирықәырҵо ахараԥса рҽацәырыхьчарц рҽазыршәоит.
"Ас еиԥш ахымҩаҧгашьа амҩатә ԥҟарақәа реилагара акәны ишьоуп, уи Аҳәынҭқарратә автоинспекциа ӷәӷәала иаҿагылоит. Изныкымкәа асеиԥш аилагарақәа ҟарҵахьеит амчратәи азинхьчаратәи русбараҭқәа русзуҩцәа", — иҳәеит Аҩӡба.
Аҩӡба инаҵшьны иазгәеиҭеит ари ахырхарҭала аусура шырӷәӷәахаз. 150 раҟара амашьынақәа ахазргыларҭақәа рахь инагоуп, рырныҟәцаҩцәагьы административтә ҭакԥхықәра рыдҵоуп. Амҩатә ԥҟарақәа еилазгаз ачынуаа рганахьала арапортқәа азырхиоуп, урҭ аусбарҭақәа рнапхгаҩцәа ирзынашьҭуп.