АҞӘА, нанҳәа 27 - Sputnik. Аҟәа алаларҭаҿы аремонттә усурақәа шымҩаԥысуа гәеиҭеит аҳҭнықалақь ахада Ҭемыр Агрба.
"Уажәтәи аамҭазы 120 метра амҩақәҵа ԥсахуп, 380 метр ԥшьыркца ахаҳәҟьаԥс шьҭаҵоуп. Ашьаҟауаа ршәарҭадаразы зҿыгҳара ҳараку ацәхыԥ ҿыцқәа ргылоуп", — иҳәеит "Ақалақьргыларапроект" анапхгаҩы Асҭамыр Ԥиԥиа.
Аусурақәа Ажәытә ҳаблахь ахаҵәирҭа аганахь иацҵахоит: араҟа ашьаҟамҩа аиҿкаареи алашарбагашьаҟақәа рыԥсахреи азԥхьагәаҭоуп. Шьапыла ицо ауаа рзы уажә иҟоу аихатә гәараанда аҭыԥан аҵиаақәа еиҭаҳахоит.
Иара убас, ақалақь алаларҭаҿ адәы аиҭашьақәыргыларазы апроект азырхиара иаҿуп. Анагӡара 2026 шықәсазы иазԥхьагәаҭоуп.
Ақалақь аҟынтәи алҵырҭаҿы, Ареспубликатә хәышәтәырҭа иахьаҵанакуа амашьынақәа рныҟәара иацу ауадаҩрақәагьы рыӡбара иаҿуп. Иааиуа амзазы амҩаҿы амашьынақәа рныргыларазы аԥкрақәа ралагаларагьы ргәы иҭоуп.
Ҭемыр Агрба иажәақәа рыла, иарбоу аусмҩаԥгатә апроблема зцу ари амҩахәҭа акырӡа арманшәалара алнаршоит.