Цәыббрамза 3 1992 шықәсазы аԥсуа — ақырҭуа еимакы аҭышәныртәаларазы анапы аҵаҩын Москватәи аиқәшаҳаҭра. Ари адокумент аҵакы далацәажәеит арадио Sputnik аефир аҟны аҭоурыхтә ҭҵаарадыррақәа рдоктор Аслан Аҩӡба.
Аицәажәара аудиофаил аҟны хыхь.
Цәыббра 3, 1992 шықәсазы Москва имҩаԥысит Урыстәыла, Қырҭҭәыла, Аԥсынтәыла рнапхгаҩцәа реиԥылара. Уи убасгьы рхы аладырхәит Нхыҵ-Кавказтәи ареспубликақәа рнапхгаҩцәа.
Даара иуадаҩыз аиҿцәажәарақәа рнаҩс аихшьаалатә документ анапы аҵаҩын. Аԥсны анапхгара ашәҟәы анапаҵаҩра аламҭалазы уаҟа иарбаз рыздыруамызт, уи аилкаара алшара рымамызт. Владислав Арӡынба аультиматум ҳасабала идыргалеит Аԥсны азы феида зламыз адокумент анапаҵаҩра. Ус шакәызгьы иара илшеит атекст аҿы иарбаз, Аԥсны ахьчаразы хатәгәаԥхарала иааны иҳадгылаз ирықәыӡбоз, апункт амхра.
Москватәи аиқәшаҳаҭра ишаҳәоз ала, цәыббра 5 асааҭ 12 рзы амчра аиур акәын хганктәи аиқәшаҳаҭра. Аха уи амчра анаиу жәа-минуҭк рнаҩс Қырҭтәыла имҩаԥнагаз ажәылара ала даҽазнык иаанарԥшит "аԥсуа зҵаара" аӡбара аибашьратә мҩала мацара ишашьҭаз.