АҞӘА, цәыббра 12 - Sputnik. Ԥақәашьтәи абжьаратә школ аҿы ашколхәыҷқәа рзы ауаажәларратә ҭыԥ аартуп.
Ари Адунеизегьтәи аԥсуа-абаза конгресси Урыстәылатәи аиҿкаара "Асоциалтә аԥшьгарақәа рзы ауаажәларратә центр" еицырзеиԥшу апроект иахәҭакуп.
"Ҳара ҳапроект Аԥсны Аҳәынҭқарра иқәынхо ахәыҷқәа асоциалтә проектҟаҵара аганахьала ркомпетенциақәа рыҩаӡара аизырҳареи рыгәҭакқәа аԥсҭазаара раларҵәареи ирызкын", — ҳәа азгәалҭеит ацентр анапхгаҩы Мариа Моисеева.
Акабинеҭ аҿы акосметикатә ремонт мҩаԥган, ашколхәыҷқәа ззыҳәоз аҩнымаҭәа, аспорттә маҭәахәқәа рзаахәан. Иара убас, Шьашьикәара, Уақәым, Мгәыӡырхәа рҿы арҭ рҩызцәа аҭыԥқәа аартхоит ҳәа аанацҳауеит АААК.