АҞӘА, цәыббра 12 - Sputnik. Афонд "Ашана" агәыҳалалратә аукцион "Аԥсҭазаара ахьӡала" иалагеит Лабра.
Уа иқәгылоуп 22 лот урҭ рҟынтәи идырҳауа зегьы инаӡам аостеогенез адиагноз змоу Дамеи Қәычбериа ихәышәтәразы идәықәҵахоит. Лотцыԥхьаӡа алагамҭатә хәыԥса шьақәыргылоуп. Иреиҵаӡоу азыԥҵәа 5000 мааҭ иҟоуп.
Ашәҟәыҩҩы Фазиль Искандер иитәыз "Ахьтәы Остап" ҳәа изышьҭоу аҭәаҳараҷ аукцион иалахәуп. Sputnik апресс-центр аиҳабы Инал Лазба жәашықәса раԥхьа абри аҩыза аукцион аҿы иааихәеит, уажәы иӡбеит наунагӡа афонд ахархәарахь ииаигарц. Лазба игәҭакы инақәыршәаны, артефакт хышықәса рахь знык аукцион аҿы иқәыргылахоит.
Арадио Sputnik аҟны адырраҭара амҩаԥгаҩ Елеонора Коӷониаԥҳа Таиф Аџьба иҩымҭақәа раԥхьатәи рҭыжьымҭа алотереиаҟны ицәырылгеит. Уаҟа иануп автор ихатәы згәаҭақәа. Изҭаху зегьы харала алахәхаразы алшара рымоуп – афонд асоциалтә еимадарақәа рҿы ишиашоу атранслиациа мҩаԥысуеит, аҭел ала иасуагьы аҭак рырҭоит.