АҞӘА, цәыббра 13 - Sputnik. 1903 шықәса рзы Гагратәи аклиматтә станциа аартра аҳаҭыр азы иҭрыжьыз араӡын жетон Гаграҟа иааргеит.
Азинтә зҵаарақәа рзы араион ахада иабжьгаҩ Баҭал Берзениа Sputnik излазеиҭеиҳәаз ала, ажетон хаҭалатәи аколлекционерцәа рыҟны иаахәан. Урҭ апринц Ольденбургтәи идҵала иҭрыжьуан, уажәы "Гагрыԥшь" ҳәа изышьҭоу аресторан аҿы акурорт аартраан асасцәа ҳамҭас ирырҭон. Убри аҟнытә ари артефакт ақалақь ауааԥсыра рзы акыр иаԥсоуп.
"Араион анапхгара ҳақалақь аҭоурых, акурорт аԥҵара аҭоурых иеиҷаҳауеит. Александр Пиотр-иԥа Ольгенбургтәи ихаан иаԥҵаз аинфраструктура иахьа уажәраанӡагьы аус ауеит", — ҳәа еиҭеиҳәеит Берзениа.
Уи иазгәеиҭеит уажәазы ари ажетон Гагра араион ахадараҿы ишыҵәаххо, насгьы иазгәеиҭеит, шықәсқәак раԥхьа ақалақь ахада даҽа жетонк аахәаны Аԥсны Абанк амузеи ҳамҭас ишеиҭаз.
Апринц Александр Ольденбургтәи аимператор Павел I имаҭа-шьмаҭа иоуп. Иара раԥхьаӡа акәны Гагра дааит 1899 шықәса рзы, уи "Аԥснытәи Ницца" ҳәа азырҳәартә иҟаиҵеит.