АҞӘА, жьҭаара 14 - Sputnik. Урыстәыла адәныҟатәи аусқәа рминистр ихаҭыԥуаҩ Михаил Галузини Европа ашәарҭадареи аусеицуреи рзы ахеилаки, Еиду Амилаҭқәа реиҿкаареи, Евроеидгылеи рхаҭарнакцәеи Женеватәи аиҿцәажәарақәа анаҩстәи араунд аҽазыҟаҵара иалацәажәеит.
Аиԥылараҿы Урыстәылатәи аган иазгәанаҭеит Аԥсни Аахыҵ Уаԥстәылеи ршәарҭадара аԥҵара ақәыршәара арцыхцыхра арӷәӷәареи, ареспубликақәеи Қырҭтәылеи рыбжьара амч ахамырхәаразы Аиқәшаҳаҭра анапаҵаҩреи шхымԥадатәиу ҳәа аанацҳауеит Урыстәыла Адәныҟатәи аусқәа рминистрра.
Кавказ ашәарҭадареи аҭышәынтәалареи ирызку Женеватәи аиҿцәажәарақәа мҩаԥысуеит 2008 шықәса инаркны, урҭ рхы аладырхәуеит Аԥсны, Аахыҵ Уаԥстәыла, Қырҭтәыла, Урыстәыла, ЕАА, ААР, ОБСЕ, ЕА.
Аиҿцәажәарақәа 64-тәи араунд мҩаԥысит рашәара 25-26 рзы, анаҩстәи араунд мҩаԥгахоит абҵарамзазы.