Аԥсны Аҳәынҭқарра ахада Бадр Гәынбеи, Хьыбла Гьерзмааԥҳаи, Владимир Спивакови реиԥылара, арра-тактикатә зыҟаҵарақәа рымҽхак, Аԥснытәи Арбџьармчқәа рахь ҭагалантәи арранаԥхьара аныҟало, насгьы Очамчыра амза нҵәаанӡа лашарада изынхо атәы шәаԥхьа Sputnik аматериал аҿы.
Ахада иҿы адкылара
Аҳәынҭқарра ахада Бадра Гәынба идикылеит Хьыбла Гьерзмааԥҳаи Владимир Спивакови, афестиваль "Хьыбла Гьерзмааԥҳа шәаалыԥхьоит..." аҳәаақәа ирҭагӡаны имҩаԥысуа аконцерт "Бзиа узбоит, аԥсҭазаара" аламҭалаз ҳәа аанацҳауеит ахада ипресс-маҵзура.
Ахада инаҵшьны иазгәеиҭеит афестиваль "Хьыбла Гьерзмааԥҳа шәаалыԥхьоит..." Аԥсны мацара акәымкәа, егьырҭ атәылақәа рзгьы иҷыдоу хҭысны ишыҟоу.
"Уи аидеологиатә гәацԥыҳәара азҭаз Хьыбла Гьерзмааԥҳа ҳреспублика хәыҷы адагьы, Урыстәыла дугьы ахьӡ ҭылгоит. Ари акыр зҵазкуа, зымҽхак ҭбаау хҭысуп. Даҽазныкгьы бзиала шәаабеит ҳәа шәаҳәо ҭабуп ҳәа шәасҳәоит афестиваль шәахьалахәу. Шәара, шәаара, шәколлегацәа, ахьӡ ду змоу амузыкарҳәаҩцәа, аопера анагӡаҩцәа арахь шәаара ҳара еиҳа ҳарӷәӷәаны, ҳхы ҳақәгәыӷуа ҳҟанаҵоит ", — иҳәеит атәыла ахада.
Владимир Спиваков аҳәынҭқарра ахада идкыларазы ҭабуп ҳәа иаҳәо иҳәеит, иахьа Аԥсуа драматә театр аҿы имҩаԥысраны иҟоу аконцерт Аџьынџьтәылатә еибашьра Дуӡӡаҿ игаз Аиааира 80 шықәса ахыҵра ишазку.
Хьыбла Гьерзмааԥҳаи Владимир Спивакови рпрограмма "Бзиа узбоит, аԥсҭазаара!" мҩаԥган Аԥснытәи адраматә театр аҿы жьҭаара 15 рзы. Артистцәа инарыгӡеит аибашьраантәи ашәақәеи аклассикатә композиторцәа раԥҵамҭақәеи.
Кәтол ақыҭахь анеира
Жьҭаара 14 рзы аҳәынҭқарра Ахада Бадра Гәынба Кәтол ақыҭа ахадара ахыбра аҿы имҩаԥысуа аиҭашьақәыргыларатә усурақәа гәеиҭеит.
Аусурақәа мызки бжаки рыла ихыркәшахоит. Ахыбраҿы еиҿкаахоит амузеи, аусмҩаԥгаҭәа ахьымҩырго азал, Аԥсны жәлар Рџьынџьтәылатә еибашьра аветеранцәа рзы азал, иара убас аҽааӡареи аҽыбӷаҟазаратә спорти рмузеи.
Аҳәынҭқарра ахада, иара убас, иҳаҩсыз ашықәс ԥхынҷкәынмзмзы Апарламент аҿы ахысрақәа раан иҭахаз адепутат Вахтанг Гәаланӡиа ҳаҭырла дигәалаиршәеит, ақыҭа ашкол даҭааит, арҵаҩцәеи аҵаҩцәеи драцәажәеит.
Аруаа рҽеизгареи рҽазыҟаҵареи
Ииасыз амчыбжь азы Аԥсны имҩаԥысит арезервуаа реизара. Уахь днеит атәыла ахада Бадра Гәынба.
Арратә уснагӡатәқәа хыркәшахеит аполигонқәа Ачмардеи Нагвалоуи рҿы аҽазыҟаҵарақәа рыла. Аԥсны Арбџьармчқәа роператив-тактикатә ҽазыҟаҵарақәа рактивтә хәҭа мҩаԥысит адҵаҟаҵаҩ хада Бадра Гәынба инапхгарала Гәылрыԥшь араион аҿтәи аполигон Ҵабал.
Аҽазыҟаҵарақәа еицрылахәуп Аԥсны Атәылахьчара аминистрреи Урыстәылатәи Арбџьармчқәеи еидҵоу рзеиԥшарратәи артиллериатәи архәҭақәа.
Аррамаҵзурауаа аибашьратә ҭагылазаашьақәа ирзырааигәаз аҭагылазаашьақәа рҿы ирласны аӡбарақәа рыдыркылон акәылӡтехника, адронқәа, арадиоелектронҿагыларатә системақәа рхы иадырхәон.
Азыҟаҵарақәа ирылахәын ихьанҭоу акәылӡтехника, авиациа.
Ажәытә школ аԥсҭазаара ҿыц
Оскар Гәазаа ихьӡ зху Гәдоуҭатәи 4-тәи абжьаратә школ еиҭашьақәыргыланы ашәқәа аадыртит.
Аусмҩаԥгатә аартра иаҭааит аҳәынҭқарра ахада Бадра Гәынба, аиҳабыра алахәылацәа, аиҭашьақәыргыларақәа афинанстә цхыраара рзызуаз Ӷәазаа рҭаацәара.
Аҳәынҭқарра ахада амеценатцәа ашкол иарҭаз ацхырааразы ҭабуп ҳәа реиҳәеит.
"Сара ҭабуп ҳәа шәасҳәар сҭахуп ашкол адгылара ахьашәҭо азы. Шәусқәа аӡәырҩы рзы иҿырԥш бзиоуп. Шәпатриотизми шәыжәлар рахь ишәымоу абзиабареи аанарԥшуеит", — ҳәа азгәеиҭеит Гәынба.
Цәыббра 1 аахыс ахәыҷқәа сменала Гәдоуҭатәи ашкол №2 аҿы аҵара рҵон.
Ҭагалантәи арранаԥхьара
Аԥсны аԥыза-министр Владимир Делба 2025 шықәса жьҭаара-абҵара амзақәа рзы аррамаҵзурахьы ааԥхьаразы адҵа инапы аҵаиҩит.
Адокумент инақәыршәаны, Атәылахьчара аминистрра ҭакԥхықәрас иадҵоуп аррахь анаԥхьара, ахылаԥшра, аҳасабырбақәа рымҩаԥгара.
Араионқәеи Аҟәа ақалақьи рхадарақәа ирыдҵоуп аррахь анаԥхьаразы акомиссиақәа раԥҵара, урҭ иахәҭоу маҭәахәыла реиқәыршәара, аррамаҵурахьы ауаа рнеира аиҿкаара. Аҩнуҵҟатәи аусқәа рминистрра –акомиссиақәа рхаҭарнакцәа рыдыргаларц, насгьы аррамаҵура иацәхьаҵуа рыԥшаарц рыдҵоуп.
Иара убас, Агәабзиарахьчара аминистрра аҳақьымцәа амедицинатә гәаҭарақәа рзы аҳақьымцәа дәықәнаҵоит, ахархәагақәа рыла еиқәнаршәоит, Аҵара аминистрра – аҵаҩцәа рнеиреи аамҭа ахырԥаразы адокументқәа реизгареи ирхылаԥшуеит.
Аланиа Апарламент аиубилеи
Аԥсны Жәлар Реизара-Апарламент аделегациа Нхыҵ Уаԥстәыла-Аланиа Апарламент ашьақәгылара 30 шықәса ахыҵра иазкыз аныҳәатә усмҩаԥгатәқәа рхы аладырхәит ҳәа аанацҳауеит Аԥсны Апарламент апресс-маҵзура.
Аделегациа иалоуп — аиҳабы Лаша Ашәбеи адепутат Асҭамыр Џьопуеи ҳәа аанацҳауеит Жәлар Реизара апресс-маҵзура.
Лаша Ашәба адныҳәаларатә ажәахә ҟаиҵеит, Нхыҵ Уаԥстәыла-Аланиа Апарламент алахәылацәа ареспублика асоциал-економикатә потенциал анагӡареи аҭоурыхтә традициақәеи, акультуратә баҟақәеи, аԥсабаратә ҭынхақәеи реиқәырхаразы азинтә шьаҭа шаԥнаҵаз азгәеиҭеит.
Уи апарламент адепутатцәеи ауаԥс жәлари аԥсуа жәлар ахақәиҭреи ахьыԥшымреи рзы ақәԥараҿы иҟарҵаз адгыларазы иҭабуп ҳәа реиҳәеит.
Аминистр иусура дамхуп
Аԥсны асоциалтә еиқәыршәареи адемографиатә политикеи рминистр Руслан Аџьба имаҵураҭыԥ аҟынтәи ихы дақәиҭтәуп.
Уи азы аусԥҟа инапы аҵеиҩит атәыла ахада Бадра Гәынба ҳәа аанацҳауеит аҳәынҭқарра ахада ипресс-маҵзура.
Аусбарҭа анапхгаҩы инапынҵақәа аамҭала иналыгӡалоит аминистр ихаҭыԥуаҩ Кама Аӡынԥҳа.
Росмолодежь рԥылара
Аусеицуреи аԥышәа аимдаразы ахырхарҭа ҿыцқәеи ирылацәажәеит Москва Аԥсны Аҩнуҵҟатәи аусқәа рминистрра аделегациеи Урыстәыла аҿари.
Аԥснытәи аделегациа наԥхгара аиҭон аҩнуҵҟатәи аусқәа рминистр Роберт Кьиут, иара убас аилазаара далахәуп Азинхьчаратә усбарҭақәа рассоциациа ахантәаҩы Баҭал Агрба. Урыстәыла аҿар аганахь ала иҟан амаҵзура анапхгаҩы Григори Гуров, абжьгаҩ Станислав Дружинин ҳәа аанацҳауеит Азакәанхьчаратә усбарҭақәа рассоциациа.
Иара убас, иазааҭгылеит аԥсуа ҿар Урыстәыла имҩаԥысуа афедералтә еицлабрақәа, афорумқәа, аҵарадырратә программақәа рылахәхара азҵаара, иалацәажәеит ахбыџқәа рыбжьара активтә тәылауаҩратә ҟазшьа ааӡара иазырхоу еицырзеиԥшу апроектқәа реиқәыршәара.
Очамчыра алашара дырцәалоит
Очамчыра араион аҿы алашара арцәаразы аамҭала аихшанҵа алагалоуп.
Жьҭаара 16 инаркны 31 рҟынӡа, есыҽны, асааҭ 10:00 инаркны 16:00 рҟынӡа астанциа маҷқәа "Мықәи" "Кәачареи" лашарада иҟазаауеит ҳәа адырра ҟанаҵеит Аенергетика аминистрра.
Алашара арцәара зыхҟьо 35 кВ зымчхара ыҟоу афымцамҩангагатә цәаҳәа "Мықә" аҿы арҿыцратә усурақәа роуп.
"Аԥсны шьапыла уахыс"
Аԥсны, апроект "Аԥсны шьапыла уахыс" быжь-қалақьк рҿы иалагеит — Гагра, Гәдоуҭа, Афон ҿыц, Аҟәа, Очамчыра, Тҟәарчал, Гал.
Урҭ рҿы аҭыԥантәи анапхгара рыцхыраарала 1,5–2 сааҭк шьапыла узнысыр ауа иҷыдоу атуристтә маршрут аԥҵоуп.
Апроект анапхгаҩы Инал Хәытаба иазгәеиҭеит дарбанзаалак акомандақәа ианиҭаху дрылалар шилшо, ахсаалаҿы амаршрутқәа арбаны, мамзаргьы иаԥырҵахьоу амаршрутқәа дырнысыр. Аҟәа иазку аинформациа а-Telegram канал аҿы уажәнатә иҟоуп.
Ақалақьтә ҿиаразы ВЕБ. РФ анапхгаратә партниор хада Ирина Макеева лажәақәа рыла, амҩақәа апроект ахсаалаҿы иадырбаз аҭыԥқәа рҿы анаплак маҷи абжьаратәи анаплакреи рыҿиара иацхраауеит..
Белгородтәи аобласт аҟынтәи асасцәа
Белгородтәи аобласт афронт иаԥну аҭыԥқәа рҟынтәи гәыԥҩык ахәыҷқәа Гаграҟа ԥсшьара иааит жьҭаара 14 рзы.
50-ҩык ахәыҷқәа ҩымчыбжь Пицунда раамҭа рхыргоит. Абри аамҭа иалагӡаны ҳасасцәа қәыԥшцәа Аԥсны аҭыԥ ԥшӡарақәеи, аԥсабареи, акультуреи ҭырҵаауеит.
Атуризм аминистрра иҟанаҵаз адыррақәа рыла, арҭ Украина Арбџьармчқәа ааха зырҭаз араионқәа рҟынтәи ахәыҷқәа аҩбатәи ргәыԥ ауп. Раԥхьатәи агәыԥ Аԥсныҟа иааит ԥхынгәымзазы.
Раԥхьатәи аоперациа
Аԥсны раԥхьаӡа акәны аамҭалатәи акардиостимулиатор ашьақәыргыларазы аԥҟара мҩаԥыргеит ҳәа аанацҳауеит Ареспубликатә хәышәтәырҭа.
Амиокардтә инфаркт змаз, ашәарҭара зҵоу агәы аритмтә еилаԥсара змаз ачымазаҩ лҭагылазаашьа хьанҭаны дрыдыркылеит. Лара амч маҷреи, ахылхаҵгьежьреи, лгәы алыхьреи рзы лхы дахашшааит.
Аҳақьымцәа иаразнак аелектрод шьақәдыргылеит, акардиостимулиатор аҿаркит лгәы аусура аҭышәныртәаларазы.
Иманшәаланы имҩаԥгаз аԥҟара ашьҭахь, ачымазаҩ Шәачатәи аклиникахь диаргеит, анаҩс агәаҭарақәеи астентқәа рышьақәыргылареи рзы.
Гал ақалақь Амш
Гал Амш азгәарҭеит ахәаша, жьҭаара 17 рзы. Ақалақь апарк хадаҿы ажәлар аныҳәа рзеиҿкаан. Ашколқәа зегьы амилаҭтә чысқәа рыла астендқәа дырхиеит.
Асценаҿы иқәгылоит аԥсуа естрада артистцәеи аҭыԥантәи арҿиаратә коллективқәеи.
Иара убас ахәыҷқәа рзы агәмырҿыӷьратә программа еиҿкаан аниматорцәа алархәны. Ахәылԥаз ақалақь Амш иазку аныҳәатә концерт араион Акультура аҩны ашҭаҿ имҩаԥган.
Асценаҿы иқәгылоит аԥсуа естрада артистцәеи аҭыԥантәи арҿиаратә коллективқәеи.
"Укәаша, ушәаҳәа, с-Урыстәыла, с-Аԥсынтәыла!"
Афестиваль "Укәаша, ушәаҳәа, с-Урыстәыла, с-Аԥсынтәыла!" аконцерт ду мҩаԥысуеит Самсон Ҷанба ихьӡ зху Аԥсуа театр аҿы жьҭаара 13 рзы.
Афестиваль аҟәатәи ахәҭа аҟны иқәгылоит 250-ҩык артистцәа, урҭ рхыԥхьаӡараҿы иҟоуп Аԥсны еицырдыруа арҿиаратә коллективқәа: Аҳәынҭқарратә ашәаҳәареи акәашареи рансамбль, ахәыҷтәы ансамбльқәа "Абаза", "Аураашьа", "Кәыдры", "Афырҭын", авокал-инструменталтә ансамбль "Гәында" уҳәа убас егьырҭгьы.
Афиналистцәа ԥхынҷкәынмзазы Москва иқәгылоит, дара иранашьахоит аԥаратә ҳамҭақәа.
Сынтәа иара жәларбжьаратәи ҳәа ахьӡ аиуит. Иара заҵәык ауп Кремльтәи ахан Аҳәынҭқарратә сценаҿы имҩаԥысуа. Апроект мҩаԥысуеит Аҳәынҭқарра ахада ифонд акультуратә хаԥшьгарақәеи "Росконцерт"-и рыцхыраарала.
"Ҭагалан аԥшшәхәқәа"
Жьҭаара 13 рзы ААУ аҟазаратә факультет аҿы иаатит IX Жәларбжьаратәи арт-пленер "Аԥсны ҭагалантәи аԥшшәхәқәа".
Апрограмма хацыркхеит аҭҵаарадырра-методикатә конференциа "Асахьаҭыхратә ҟазараҿы атрадициақәеи иахьатәи аамҭеи" ала, уи ашьҭахь алахәылацәа апленертә ныҟәарақәа мҩаԥыргоит Аԥсны аҭыԥ ԥшӡарақәа рахь.
Асахьаҭыхыҩцәа аус руоит Аҟәа, Афон ҿыц, аӡиа Риҵа, Очамчыра араион рҿы. Апроект жьҭаара 20 рзы Аԥснытәи аҳәынҭқарратә университет афоие аҿы аусумҭақәа аҵыхәтәантәи рцәыргақәҵа ала ихыркәшахоит.
Аусмҩаԥгатә хықәкы хадас иамоуп – аԥсуа сахьаҭыхыҩцәа ҿарацәа рылаԥшҳәаақәа рырҭбаара, аԥышәа аимдара, арҿиаратә еимадарақәа рырӷәӷәара.
Арт-пленер Владислав Арӡынба диижьҭеи 80 шықәса аҵра иазкуп. Аҳәынҭқарра ахада Бадра Гәынба иусԥҟала 2025-тәи ашықәс Аԥсны раԥхьатәи ахада ишықәсны ирылаҳәоуп.