АҞӘА, жьҭаара 22 – Sputnik. Урыстәылатәи амашьынаныҟәцаратә зин 2027 шықәса хәажәкырамза 1 инаркны урҭ зтәу ишәарҭоу ачымазарақәа рыдбалахар ирымххоит ҳәа иҳәеит Аҳәынҭқарратә Дума адепутат Сергеи Колунов РИА Новости аинтервиу аҭо.
Амашьынаныҟәцаҩ игәабзиара иадҳәалоу апроблемақәа азгәаҭахар, аԥсихикатә чымазарақәагьы уахь иналаҵаны, уи азы адыррақәа Агәабзиарахьчара аминистрра иаку ашәҟәынҵахь (ЕГИСЗ) иҭаргалоит, ашәҟәынца адыррақәа аиур алшоит Аҩнуҵҟатәи аусқәа рминистрра.
Иара иазгәеиҭеит, амашьына аԥсҟы зку амашьына аныҟәцараз ԥырхагак имазар, уи иазԥхьагәаҭам аҳақьымтә гәаҭарахь ддәықәҵахоит ҳәа. Ари ауаҩ, уи мап ацәикыр, изинбӷьыц автоматла амч ацәыӡуеит, амашьынаныҟәцаҩгьы уи азы адырра ирҭоит.
Иара иажәақәа рыла, ари алагаламҭа ҿыц амҩаҿы ашәарҭадара еиӷьнатәуеит, ауаа рзы ашәарҭара зҵоу аҭагылазаашьақәа змоу амашьына аныҟәцара азин рнаҭом.
Аԥсны инхо, Аԥсны атәылауаҩра змоу Урыстәыла атәылауаа ирмариоу ԥҟарала аныҟәцаратә зинбӷьыц роур рылшоит. Уи азы аусԥҟа Урыстәыла ахада Владимир Путин 2025 шықәса мшаԥымзазы инапы аҵеиҩит.