АҞӘА, жьҭаара 26 - Sputnik. Аҟәа ақалақь аҿы Урыстәыла амузеиқәа рҟынтәи ацәыргақәҵа дуқәа рымҩаԥгара азԥхьагәаҭоуп 2026-2027 шықәсқәа рзы ҳәа аҳәамҭа ҟалҵеит Ацәыргақәҵатә зал хада аиҳабы Ельвира Арсалиаԥҳа Жәларбжьаратәи аусеицура афорум аҳәаақәа ирҭагӡаны.
"Иахьа Аԥсны аделегациа ҳалахәны ҳара ҳколлегацәа, амузеи дуқәа рнапхгаҩцәа ҳарԥылеит, 2026-2027 шықәсқәа рзы ацәыргақәҵатә проект дуқәа шымҩаԥаагаша ҳрызхәыцлоит", — ҳәа еиҭалҳәеит лара.
Арсалиа инаҵшьны иазгәалҭеит Аԥсни Урыстәылеи ркультуратә еимадара ибеиоу аҭоурых шрымоу, уи иахьагьы активла ишыҿио. Афорум акыр зҵазкуа акультуратә диалог азы даҽа ҭыԥны иҟалеит ҳәа азгәалҭеит лара.
Жәларбжьаратәи аусеицуратә форум Москва ақалақь аҿы жьҭаарамза 26-27 рзы имҩаԥысуеит, иара аҳәынҭқарратә дипломатиа ашьақәгылара 100 шықәса ахыҵра иазкуп. Уи иалахәуп Европа, Азиа, Африка, Латинтәи Америка рҟынтәи 55 тәыла рхаҭарнакцәа. Афорум еиҿыркаауеит Россотрудничествои Афонд Росконгресси.