АҞӘА, жьҭаара 26 - Sputnik. Очамчыра ахақәиҭтәразы аоперациаан иҭахаз аибашьцәа ргәаладыршәеит Аҽгәара ақыҭан.
Ашәҭшьҭаҵара рхы аладырхәит ахада ихаҭыԥуаҩ Беслан Бигәаа, араион ахада Алхас Кациа, иҭахаз рыуацәеи, ауаажәларреи ҳәа аанацҳауеит Очамчыра Информ.
Очамчыра ақалақь ахақәиҭтәразы ажәылара иалахәын Борис Ԥачлиа напхгара зиҭоз агәыԥ "Дед"-и Нодар Какәбаа напхгара зиҭоз "Скорпион"-и. 1992 шықәса жьҭаарамза 26 рзы аоперациа ианалага агәыԥқәа ирылшеит ҩ-ганк рыла ақалақь иалаланы амилициа ахыбра аанкылара. Аха амшын аҟынтә иззыԥшыз адесант анзыӡхымҵ, ихьаҵыр акәхеит. "Скорпион" аибашьцәа ақалақь иалахеит. "Дед" игәыԥ Аҽгәара азааигәара аӷа ихымца иақәшәеит.
Аԥсны ахада идҵала, агәыԥ "Дед" аҟынтәи 33-ҩык аибашьцәа "Аиааиразы" амедаль ранашьан, урҭ рахьтә 23-ҩык рҭахара ашьҭахь. Аибашьра ашьҭахь, агәыԥ ахьҭахаз аҭыԥ аҿы амармалтә ӷәы шьақәдыргылеит, уи аҭыԥан 2018 шықәсазы абаҟа дыргылеит.