АҞӘА, жәабран 20– Sputnik, Сариа Кәарацхьелиаԥҳа. Иахьатәи аамҭазы Афинансқәа рминистрра аҿаԥхьа ихадоу усны иҟоуп абиуџьеттә ҳасаббареи аиҿкаара апроцесси автоматизациа азура ҳәа радио Sputnik иазеиҭалҳәеит Аԥсны Аҳәынҭқарра Афинансқәа рминистр инапынҵақәа рынагӡара зду, Афинансқәа рминистр ихаҭыԥуаҩ Ирма Амҷԥҳа.
"Иахьазы ҳара ҳҿы абиуџьет анагӡара автоматизациа азууп, аха аиҿкаара апроцесс макьаназ уахь иаҳзиамгацт. Убри инадҳәаланы иахьатәи аамҭазы Афинансқәа рминистрра аҿаԥхьа ихадоу усны иҟоуп абиуџьеттә ҳасаббареи аиҿкаара апроцесси автоматизациа азура. Аминистрра аусура ҳалацәажәозар, уи ԥхьаҟагьы аусура шымҩаԥнагац имҩаԥнагалоит", — лҳәеит Ирма Амҷԥҳа.
Лара иара убасгьы далацәажәеит аминистрра аус хадақәа рахь ишаҵанакуа абиуџьет анагӡареи иара хра аманы ахархәареи.
"Афинансқәа рминистрра аҿаԥхьа иҟоу адҵақәа ируакуп аусура азакәанԥҵара инақәыршәаны амҩаԥгара. Аусбарҭа аус хада – уи абиуџьет анагӡароуп, абиуџьет ԥарақәа хықәкылеи хра рымани рныхроуп", — лҳәеит Аԥсны Аҳәынҭқарра Афинансқәа рминистр инапынҵақәа рынагӡара зду, Афинансқәа рминистр ихаҭыԥуаҩ Ирма Амҷԥҳа.
Ареспублика афинанстә ҭагылазаашьа иахьазы ишьақәтәоуп ҳәа азгәалҭеит аминистр инапынҵақәа назыгӡо.