АҞӘА, хәажәкыра 13 – Sputnik. Миллион квадрат ԥшьыркца рҟынӡа аҵакыра рыцқьоуп Приморск ақыҭаҿ Атәылахьчара аминистрра аџьаԥҳанышьҭаҵарҭаҿ аҭыԥ змаз ахҭыс ашьҭахь ҳәа адырра ҟалҵеит Аԥсны Ахада ипресс-маӡаныҟәгаҩ Наала Аҩӡыԥҳа.
"Аԥсны иҟоу Halo Trust апрограмматә менеџьер Исмет Заде аилацәажәара алахәылацәа ирзеиҭеиҳәеит иԥжәар зылшо амаҭәарқәа рҟынтәи аҵакырадгьыл арыцқьара шымҩаԥысуа. Иахьазы Halo Trust ацхыраарала миллион квадрат ԥшьыркца рҟынӡа аҵакыра рыцқьоуп", — ҳәа еиҭалҳәоит Аҩӡыԥҳа.
Ахада ипресс-маҵзураҿы ишырҳәо ала Рауль Ҳаџьымба Аԥыза-министр инапы ианиҵеит ареспублика абиуџьет аҟынтәи аԥаразоужьра-цҵа мҩаԥигарц.