Марттәи ажәылара ашьҭахь аибашьцәа зегьы еилыркааит аиааира агаразы шьаҿақәак шаҳзаанхаз. Аӷагьы еиликааит ҳамчқәа зеиԥшраз, ҳәа иҳәеит Агәымшәаразы амедал занашьоу Зураб Оҭырба.
"Март мза 15 рзы, ахырӷәӷәарҭақәа ҳнаскьаны ҳнарыдгылеит, исгәалашәоит асааҭ 4-5 шыҟаз, ашамҭазы адҵа ҳауит ажәылара ицатәуп ҳәа. Ҳара ишаҳдыруаз ала раԥхьатәи аешелонанцалакь, аҩбатәи аешелон ашьҭалон. Агәымшәара аарԥшны, аӡәгьы дымхьаҵкәа ажәылара ҳалагеит. Аӡы ҳаруан, аха уи уадаҩын. Аӡы арра ԥыҭк шҳагыз, аибашьцәа аӡы ишҭагылаз — аӷацәа ҳалахысра иалагеит. Аҵх аарла ишо убас аиҿахысра ҳалагеит. Аԥхьа ҳҽынашьҭаҳкит, шьоукы уа аӡы ишҭагылаз ахқәа рҽацәхьаркуа иалагеит", — ҳәа игәалаиршәоит аветеран.
Аибашьҩы игәаанагарала, марттәи ажәылара алҵшәа аимуӡеит ҳәа аҳәара иашаӡам. Хәыҷык азеилибамкаара, хәыҷык аиҿымкаара иахҟьаны илҵшәадахеит ажәылара, аха аиааира ҳазааигәанатәит.