АҞӘА, хәажәкыра 28 – Sputnik, Бадри Есиава. Аилацәажәараҿы иҳәан Очамчыра араион ақыҭақәа Река, Лашькьындар, Аҽгәара рҿы 300 кьыла рҟынӡа амармалташь пты еизыргахьеит ҳәа. Абри атәы Sputnik акорреспондент изеиҭеиҳәеит Очамчыра араион Ахада Хьрыԥс Џьопуа.
Хьрыԥс Џьопуа иазгәеиҭеит апты аизгара знапы алаку рҟынтә шамахамзар зегьы уи азы аԥара ҳазыԥшым ҳәа шырҳәаз.
Дара еизыргаз апты амца иақәҵаны ирбылуеит. Индырҵәоит.
Хәажәкыра 25 рзы имҩаԥысыз аилацәажәараҿы Урыстәыла Ақыҭанхамҩа аминистр ихаҭыԥуаҩ Џьамбулат Хатуов аҽазныкгьы иҳәеит ишазыхио кьылак апты азы зықьмааҭ ашәара.
Амармалташь пты Амшынеиқәа аԥшаҳәахьы ицәырҵит ԥшьышықәса раԥхьа. Аекологцәа ишырҳәо ала иахьатәи аамҭазы иара иаҿагыло методикак алкааны ишьақәыргылам.
Аптқәа цәырҵит иара убасгьы Новоросиискии Шәачеи ақалақьқәа рҟны.