АҞӘА, мшаԥы 10— Sputnik. Израиль аракетақәа рыла Хомс иҟоу шьамтәылатәи аҳаиртә баӷәаза ианеихсуаз хҩык Иран атәылауаа ҭахеит ҳәа аанацҳауеит РИА Новости, амаҵзура FARS адыррақәа ҵаҵӷәыс иҟаҵаны.
Ашәахьа ауха израильтәи аҳаиртә арратә мчрақәа аҳаиртә баӷәаза Тифор иехсуан аҳаирпланқәа F-15 рыла. Абаӷәаза иаахеит аракетақәа хԥа, егьырҭ аҳауаҿ иԥжәан.
Абаӷәазаҿ иҟоу урыстәылатәи абжьагаҩцәа ԥырхага рмоуит.
Жәабранмзазы израильаа иреихсхьан аҳаиртә баӷәаза T-4. Усҟан аракетамҩангаҩ F-16 адгьыл аҟынтәи иаехсны икарыжьит.