АҞӘА, лаҵара 7– Sputnik, Сариа Кәарацхелиаԥҳа. Руслан Дорошенко игәы аоперациа азыруит. Уажәы иара иҭагылазаашьа ҭышәынтәалоуп лҳәеит афонд "Ашана" адиректор инапынҵақәа назыгӡо Мактина Џьынџьалԥҳа.
Руслан аоперациа изиуит Томсктәи анаука-ҭҵааратә институт акардиохирург Евгени Кривошьчеков.
"Аоперациа быжьсааҭк инарзынаԥшуа имҩаԥысуан. Аҳақьымцәа аиааира ргеит. Уажәшьҭа Руслан Дорошенко иԥсҭазаара шәарҭа амам. Ушьҭарнахыс аоперациа иҭахӡам. Дыбзиахеит" — лҳәеит афонд адиректор.
Руслан иан Лиа Чекориа лажәақәа рыла лыҷкәын зегьы асалам рзааиҭиуеит. Уи игәабзиара шьақәгылоит.
Томск имҩаԥыргаз аоперациа ахә дууп: миллионки 65 нызқь мааҭ иаԥсоуп.
Италиатәи агәыҳалалратә Ассоциациа "Помогите спасти детей (AiutateciaSalvareiBambiniOnlus) ԥшьнызқь евро ашәеит, иаанхаз афонд "Русфонд" иашәеит.