АҞӘА, лаҵара 18 – Sputnik, Сариа Кәарацхьелиаԥҳа. Ашьапылампыл азы Аԥсны ачемпионат хыркәшахеит аҳҭнықалақь акоманда "Нарҭ" заанаҵтәи аиааирала иҳәеит ашьапылампыл азы Аԥсны Афедерациа апрезидент Џьума Кәарацхьелиа.
"XXV ашьапылампыл азы Аԥсны ачемпионат атурқәа реихшьаалақәа рыла аҟәатәи "Нарҭ" 27 кәатала аманы егьырҭ акомандақәа ираԥнагеит. Астадион "Динамо" аҿы "Нарҭи" "Гагреи" реицыхәмарра 3:1 ҳәа ихыркәшахеит. Ачемпионат иалахәын акомандақәа быжьба", — иҳәеит Џьума Кәарацхьелиа.
"Нарҭ" аиааира алзыршаз ахәмарыҩцәа аусурахь рыбзиабареи рҽеиқәыршәаны рыхәмарреи роуп иҳәеит акоманда азыҟаҵаҩ Ферас Исмаил.
Акоманда акапитан Лаша Кәаӷәаниа уи иациҵеит ашьапылампыласыҩцәа аханатәгьы рҿаԥхьа дҵаны аиааира шықәдыргылаз.
"Ҳара ҳхықәкы ҳазнеиуан. Иҳалшо зегьы ҟаҳҵеит", — иҳәеит иара.
2018 шықәсазтәи ачемпионат ркьаҿны имҩаԥган, ахәмарыҩцәа Лондон, ConIFA аверсиала имҩаԥысраны иҟоу адунеи ачемпионат ахь аҽазыҟаҵаразы аамҭа роурц азы.
XXV ашьапылампыл азы Аԥсны ачемпионат иалахәын акомандақәа быжьба: аҟәатәиқәа "Нарҭи" "Динамои", гәдоуҭатәи "Риҵа", афонтәи "Афон", очамчыратәи "Ерцахә", галтәи "Самырзаҟан", гагратәи "Гагра".
Аԥсны Афедерациа апрезидент Џьума Кәарацхьелиа дақәгәыӷуеит ҳаспортсменцәа Лонданынтәи аиааира рыманы ихынҳәып ҳәа.