АҞӘА, лаҵара 25– Sputnik, Бадраҟ Аҩӡба. Аԥснытәи ашколқәа 156 рҟны игеит аушьҭымҭацәа рзы аҵыхәтәантәи аҵәҵәабжьы.
Лакоба ихьӡ зху Аҟәатәи Ашьхаруаа рышкол № 10 аҟны традициала аныҳәатә уснагӡатәқәа ирылагеит аҳәынҭқарратә бираҟ ашьҭыхрала. Ашкол адиректор Аида Кәарҷелиаԥҳа аушьҭымҭацәа дрыдныҳәало ирзеиӷьалшьеит ақәҿиарақәеи аманшәалареи.
"Гәык-ԥсык ала ишәыдысныҳәалоит иахьатәи аныҳәа. Ҳашколхәыҷқәа еснагь рҽалыркаауан аҳҭнықалақьи ареспубликеи рҿы имҩаԥыргоз аолимпиадақәа рҟны, иааныркылон актәи аҭыԥқәа. Ареспубликаҿы имҩаԥысуаз амаҭәартә олимпиадақәа рҟны 25-ҩык ҳҵаҩцәа аиааирақәа ргеит", — лҳәеит ашкол адиректор.
Аныҳәатә уснагӡатәқәа дрылахәын аҳҭнықалақь Ахада Адгәыр Ҳаразиа.
"Ашкол аҵаҩцәагьы арҵаҩцәагьы ишәыдысныҳәалоит иахьатәи амш. Ашкол аҭоурых ду змоу школуп. Ароуп аҵара ахьырҵоз аԥсуа литература ашьаҭаркҩы Дырмит Гәлиа, аҵарауаа Шалуа Инал-иԥа, Гьаргь Ӡиӡариа уҳәа иналукааша аԥсуа интеллигенциа", — иҳәеит иара.
Аныҳәа афырхацәа хадацәа, аушьҭымҭацәа ажәеинраалақәа ирыԥхьон, инарыгӡон амилаҭтә ашәақәа, акәашарақәа.
"Жәеиза шықәса аҵара ҳҵон. Ҩнык иаҳзаҩызан ҳашкол. Иара убри аамҭазы ҳаԥхьа амҩа ҿыц шьҭоуп. Иаҳзыԥшуп аинтерес ду зҵоу аԥсҭазаара", — лҳәеит аушьҭымҭа Иалса Мқанԥҳа.
Ашкол аушьҭымҭа Наур Ешба иҭахуп дԥырыҩхарц. Уи азы Улиановскҟа дцоит ҵараҵара.
Александр Пушкин ихьӡ зху ашкол № 2 аҟынгьы ашҭа иҭыҩуан амузыка, ашәақәа, еилаӡҩон аччаԥшьи алаӷырӡи. Игон аҵыхәтәантәи аҵәҵәабжьы, ажәҩан иалалон еиуеиԥшым аԥшшәхәқәа змоу анкьапышҭарчқәа.